Ռուսաստանում զգուշացրել են Պուտինի մասնակցությամբ գագաթնաժողովում ահաբեկչության վտանգի մասին

Քաղաքագետ Սերգեյ Մարկովը հայտարարել է, որ Եվրոպայում նախատեսվող գագաթնաժողովի ընթացքում, որտեղ պետք է մասնակցի Ռուսաստանի նախագահ Վլադիմիր Պուտինը, կարող է լինել ահաբեկչության վտանգ։ Այդ մասին նա գրել է իր Telegram-ալիքում։

Մարկովի խոսքով՝ Պուտինին փորձում են հրավիրել հանդիպման Ուկրաինայի նախագահ Վլադիմիր Զելենսկու հետ․ «Պուտինին սպասում են Եվրոպայում՝ Հռոմում, Շվեյցարիայում կամ ցանկացած քաղաքում»։ Քաղաքագետը համոզված է, որ նման այցը կարող է ավարտվել ողբերգությամբ։ Նա առաջարկել է, որ գագաթնաժողովը անցկացվի ավելի անվտանգ վայրերում՝ օրինակ Մինսկում, Աստանայում կամ Չինաստանում։

Ավելի վաղ հայտնի էր դարձել, որ Շվեյցարիան պատրաստ է տրամադրել Պուտինին «անձեռնմխելիություն ձերբակալությունից», եթե նա այցելի երկիր բանակցությունների համար։ Շվեյցարիայի արտգործնախարար Ինյացիո Կասիսը նշել է, որ երկիրը «ավելի քան պատրաստ է» ընդունելու Ռուսաստանի և Ուկրաինայի առաջնորդների հանդիպումը։ Մինչ այդ Sky News-ը հայտնել էր, որ որպես ԱՄՆ-ի նախագահ Դոնալդ Թրամփի, Պուտինի և Զելենսկու հնարավոր հանդիպման վայր դիտարկվում են Հռոմը և Ժնևը։