Ռուսաստանում վառելիքի գները հասել են պատմական ռեկորդի

Պետերբուրգյան բորսայի տվյալներով՝ օգոստոսի 20-ի սակարկությունների արդյունքում ԱИ-92 և ԱИ-95 տեսակի բենզինի գները հասել են իրենց պատմական առավելագույնին։ ԱԻ-92-ի արժեքը Եվրոպական Ռուսաստանի տարածքի համար բարձրացել է 0,76 տոկոսով՝ հասնելով 72 514 ռուբլու մեկ տոննայի դիմաց, իսկ ԱԻ-95-ի գինը աճել է 1,13 տոկոսով՝ հասնելով 82 253 ռուբլու։ Ուրալի և Սիբիրի շրջաններում գները մի փոքր ցածր են, սակայն ԱԻ-92-ն Սիբիրում և Հեռավոր Արևելքում արդեն աճել է մինչև 74 861 ռուբլու։

Վերջին օրերին աճ է գրանցում նաև դիզվառելիքը՝ ավելանալով օրական ավելի քան մեկ տոկոսով, սակայն դեռևս չի հասել պատմական առավելագույնին։ Նույն ժամանակ երեք տարածաշրջան արդեն հայտնել է վառելիքի պակասի և բենզալցակայաններում պարբերաբար առաջացող դեֆիցիտի մասին։ Ղրիմի ղեկավար Սերգեյ Աքսենովի խոսքով՝ պատճառը բենզինի արտադրության նվազումն է, ինչպես նաև այն, որ վառելիքը տարածաշրջաններ հիմնականում տեղափոխվում է ավտոտրանսպորտով և երբեմն այն պարզապես չեն հասցնում ժամանակին մատակարարել, հայտնում է Лента.ру-ն։

Մասնագետները նշում են, որ իրավիճակը պայմանավորված է նավթավերամշակման գործարաններում արտադրության կրճատմամբ, որը կապված է երկարաձգված պլանային և արտակարգ վերանորոգումների հետ։ Բացի այդ, փակ վիճակագրության գործոնը շուկայում առաջացնում է լրացուցիչ անորոշություն, ինչի հետևանքով բենզինի պահեստային գնումներն աճում են։ Նույնիսկ արտահանման լիակատար արգելքը օգոստոսից չի տվել սպասվող արդյունքը, իսկ իշխանությունների հնարավորությունը իրավիճակը կարգավորելու՝ սահմանափակ է։