Նախկին դատավորի դուստրը ձերբակալվել է փողերի լվացման կասկածանքով

Կրասնոդարի Օկտյաբրսկի դատարանը կալանավորել է Սուսանա Կոբլևային՝ Ադիգեայի Գերագույն դատարանի նախկին նախագահ Ասլան Տրախովի դստերը։ Նա մեղադրվում է խոշոր չափերի խարդախության և ապօրինի եկամուտների լվացման մեջ, հայտնում է Коммерсантъ-ը։

Քրեական գործի մանրամասները չեն բացահայտվում։ Ավելի վաղ նույն դատարանը կալանավորել էր նաև Կոբլևայի նախկին ամուսնուն՝ Կապլան Կոբլևին, ինչպես նաև գործարարներ Ալեքսեյ Երեմիշկոյին և Ալեքսանդր Ագեևին։ Նրանք ներգրավված են Գլխավոր դատախազության հայցով հարուցված գործի շրջանակում, որը վերաբերում է Տրախովների ընտանիքի կոռուպցիոն գույքի բռնագանձմանը։

Ըստ մեղադրանքի՝ Սուսանան, չունենալով օրինական եկամուտներ, 2002-2019 թթ․ ձեռք է բերել 68 անշարժ գույք։ Հոր պաշտոնից հեռանալուց հետո նրա անունով ձևակերպվել է արդեն ավելի քան 100 գույք՝ ընդհանուր առմամբ 820 մլն ռուբլու արժողությամբ։ Գլխավոր դատախազությունը պահանջում է բռնագրավել նախկին դատավորի ընտանիքի շուրջ 2,5 միլիարդ ռուբլու ակտիվները։