«Մենք անկախության սերունդն ենք». ցուցահանդես` նվիրված ՀՀ անկախության 20 ամյակին

ՀՀ վարչապետ Տիգրան Սարգսյանի հովանավորությամբ և աջակցությամբ ՀՀ Մշակույթի նախարարության ու Արարատյան հայրապետական թեմի՝ հունվարի 20-ին Հ. Թումանյանի տուն-թանգարանում տեղի ունեցավ <<Մենք անկախության սերունդն ենք>> գեղանկարի մանկապատանեկան ցուցահանդեսը՝ նվիրված ՀՀ անկախության 20 ամյակին: Ցուցահանդեսի կազամկերպիչն է ՀՀ Մշակույթի նախարարության <<Մշակութային կրթության աջակցության>> հիմնադրամը:

Ցուցահանդեսին մասնակցում են ՀՀ բոլոր մարզերի գեղարվեստի և արվեստի դպրոցների 6-15 տարեկան թվով 120 աշակերտ: Ցուցահանդեսին նվիրված՝ 2011 թ. լույս է տեսել <<Մենք անկախության սերունդն ենք>> ծավալուն գիրք-ալբոմը, որտեղ ամփոփվել են ոչ միայն ցուցահանդեսի մասնակից պատանի նկարիչների գործերը, այլև կազմակերպիչների ուղերձներն ուղղված անկախության սերնդին: Ալբոմում տեղ են գտել նաև ճանաչողական հետաքրքիր դրվագներ՝ սկսած Նոյի որդիների ծննդաբանությունից /Արամի ցեղը՝ ըստ Ս. գրքի/: Համառոտ ակնարկով ներկայացված է հայոց պետականության պատմությունը /վաղ պետական կազմավորումներից՝ Հայկ դյուցազնից մինչև Հայաստանի մերօրյա հանրապետությունը/: Պատանի ընթերցողը տեղեկություններ ձեռք կբերի նաև ՀՀ զինանշանի, դրոշի, օրհներգի, պետական պարգևների, մեդալների, դրամի ու հուշադրամների մասին: Գիրք-ալբոմի հրատարակմանը աջակցել են ՀՀ կառավարությունը, Արարատյան հայրապետական թեմը, Աշխարհի հայ նկարիչների միավորումը, ՀՀ Մշակույթի նախարարությունը:

«Մշակութային կրթության աջակցության» հիմնադրամը 2011 թ. Երևանի 1 և մարզային 10 ներկայացուցչությունների միջոցով ուսումնամեթոդական և գործնական աջակցություն է ցուցաբերել հանրապետության երաժշտական, արվեստի, գեղարվեստի ու պարարվեստի դպրոցներին /9000 աշակերտի, 1930 մանկավարժի/: Հանրապետության առաջատար մասնագետների միջոցով ՀՀ մարզերում և ԼՂՀ-ում կազմակերպել է վարպետության դասեր, որոնց մասնակցել են 570 սովորող և 530 մանկավարժ: Գեղարվեստական կրթության մատչելիության և որակի բարձրացման նպատակով 33 հենակետային դպրոցներում (յուրաքանչյուր մարզում 3-ական) կազմակերպվել է հանրապետական մի շարք մրցույթներ, փառատոններ, ցուցահանդեսների մարզային փուլեր, համերգներ, համերգ-դասախոսություններ, անցկացվել են վերապատրաստման դասընթացներ: