Ռուսական ԲՊԼԱ-ների խոշոր արտադրողը կանգնած է սնանկության շեմին

Ռուսաստանի խոշորագույն անօդաչու թռչող սարքերի արտադրող «Կրոնշտադտ» ընկերությունը վերջին ամիսներին բախվել է տասնյակ դատական հայցերի՝ կուտակված պարտքերի պատճառով։ Ըստ Արբիտրաժային դատարանների տվյալների՝ միայն վերջին երեք ամսում ընկերությունից պահանջվել է վերադարձնել ավելի քան 600 միլիոն ռուբլի։ Ամենամեծ պահանջներն են՝ 220,6 միլիոն ռուբլի՝ «Ժամանակակից հեռահաղորդակցության տեխնոլոգիաների գիտահետազոտական ինստիտուտից» և 151,1 միլիոն ռուբլի՝ «Ինովացիոն տեխնոլոգիաներ և նյութեր» ընկերությունից։

Ընդհանուր պարտքերը այս տարվա մայիսին արդեն հասել էին մեկ միլիարդ ռուբլու։ Գործարար շրջանակների ներկայացուցիչները նշում են, որ «Կրոնշտադտը» լուրջ ֆինանսական դժվարությունների մեջ է հայտնվել վերջին երկու տարիներին։ Հիմնական պատճառներից է համարվում 2022-ին հիմնական բաժնետեր ԱՖԿ «Սիստեմայի» դուրս գալը։ Դրան գումարվել են արևմտյան պատժամիջոցները, բաղադրիչների թանկացումը և մեծածավալ պետական պատվերների ծանրաբեռնվածությունը։

«Ռուսդրոնոպորտ» ընկերության ղեկավար Նիկոլայ Ռյաշինն կանխատեսում է, որ «Կրոնշտադտը» կգնա սնանկացման ճանապարհով, ինչի հետևանքով մատակարարները շտապում են իրենց պահանջները գրանցել՝ հերթում առաջին տեղում լինելու համար։ Նկատենք, որ օրերս վարչապետ Միխայիլ Միշուստինը հայտարարել էր, թե ազգային ծրագիրը ԲՊԼԱ-ների ոլորտում արդյունավետ է գործում և դրանում մեծ դեր ունի պետական աջակցությունը։