Չինական Guowang արբանյակային ցանցը մտահոգում է ԱՄՆ-ին

Ամերիկյան ArsTechnica պորտալի գնահատմամբ՝ Չինաստանի նոր արբանյակային ցանցը՝ Guowang, կարող է սպառնալիք ներկայացնել ԱՄՆ-ի համար։ Թեև այն պաշտոնապես դիտարկվում է որպես քաղաքացիական ծրագիր, դրա ճարտարապետությունը ավելի մոտ է ռազմական նշանակության Starshield համակարգին, որը ստեղծում է SpaceX-ը։ Guowang-ի արբանյակները արտադրվում են տարբեր ընկերությունների կողմից և դուրս են բերվում ուղեծիր բազմատեսակ հրթիռներով, ինչը ևս մեծացնում է դրա հնարավոր ռազմական կիրառման վարկածները։

Փորձագետ Սթիվեն Կլարքի գնահատմամբ՝ Guowang-ը տարբերվում է մյուս չինական Qianfan ծրագրից, որը շատ ավելի մոտ է համարվում Starlink-ի քաղաքացիական մոդելին։ Այս պահի դրությամբ ուղեծիր է դուրս բերվել 72 սարքավորում՝ նախատեսված մոտ 13 հազարից։ Համեմատության համար՝ SpaceX արդեն ԱՄՆ Ազգային ռազմական տիեզերական հետախուզության կառույցի համար գործարկել է շուրջ 200 Starshield արբանյակ։

Արևմտյան վերլուծաբանները նկատում են, որ Չինաստանի այս քայլը նոր լարվածություն է ստեղծում տիեզերական մրցավազքում, որտեղ տեխնոլոգիաների զարգացումը ստանում է ոչ միայն տնտեսական, այլև հստակ ռազմավարական նշանակություն։ Այս ֆոնին հիշեցվում է նաև, որ Ռուսաստանը շարունակում է զարգացնել իր «Տոբոլ» և «Կալինկա» համալիրները, որոնք Կիևի հակամարտության գոտում անվանում են «Starlink-ի ոչնչացնողներ»։