Հնդկաստանը չի հրաժարվում ռուսական նավթից՝ չնայած ԱՄՆ ճնշումներին

Bloomberg-ի հրապարակումից հետո տարածված լուրերը, թե Հնդկաստանը դադարեցրել է ռուսական նավթի գնումները ԱՄՆ-ի կողմից բարձր մաքսատուրքեր սահմանելու պատճառով, չեն հաստատվել։ Հնդկական պետական նավթավերամշակման գործարանները՝ Indian Oil Corp. և Bharat Petroleum Corp., կարճ դադարից հետո վերականգնել են մատակարարումները Ռուսաստանից։

Հնդկաստանի դեսպանը Մոսկվայում Վինայ Կումարը շեշտել է, որ Նյու Դելիի ընտրությունը պայմանավորված է բացառապես ազգային շահերով։ «Հնդկաստանը գնում է այն, ինչ լավագույնն է իր ժողովրդի համար։ Սա երկրի անվտանգության ու էներգետիկ պահանջների հարց է», — հայտարարել է դեսպանը։ Նավթի և գազի նախարար Հարդիպ Սինգհ Փուրին էլ վստահեցրել է, որ էներգետիկ ոլորտում համագործակցությունը Ռուսաստանի հետ մնում է բարձր մակարդակի վրա։

Ռուսաստանից մատակարարումները շարունակվում են ոչ միայն նավթի, այլև ածխի ու նավթամթերքների ուղղությամբ, և դրանցից ավելի քան 90 տոկոսը արդեն հաշվարկվում է ազգային արժույթներով։ Փորձագետների կարծիքով՝ հնդկական ընկերությունների որոշումը անտեսել ԱՄՆ սպառնալիքները ցույց է տալիս, որ խոսքը ավելի շատ քաղաքական-առևտրային բանակցությունների մասին էր, քան իրական էներգետիկ սահմանափակումների։