Ռուսական նավթի հարցում ձեր հայտարարությունները անտրամաբանական են. Հնդկաստանը՝ ԱՄՆ-ին

Հնդկաստանի արտգործնախարար Սուբրամանյամ Ջայշանկարը կոշտ արձագանքել է Վաշինգտոնի՝ ռուսական նավթի ներմուծման հարցում առաջ քաշած մեղադրանքներին։ Նա ընդգծել է, որ ԱՄՆ-ի քայլերը՝ հանկարծակի բարձրացնելով հնդկական ապրանքների ներմուծման մաքսատուրքը, որևէ տրամաբանական բացատրություն չունեն։

Ջայշանկարի խոսքով՝ դեռևս մինչև սակագնային քաղաքականության կտրուկ խստացումը հենց ամերիկացի պաշտոնյաներն էին հորդորում Նյու Դելիին շարունակել նավթի գնումները, որպեսզի խուսափեն գլոբալ էներգետիկ շուկայի վտանգավոր անկայունությունից։ «Մենք անկեղծորեն ապշած ենք ԱՄՆ-ի այս հակասական մոտեցումից», — նշել է նախարարը՝ մատնանշելով Վաշինգտոնի երկակի քաղաքականությունը։

Հնդկաստանի ԱԳՆ ղեկավարը նաև հարց է բարձրացրել, թե ինչու Վաշինգտոնը նման սահմանափակումներ չի կիրառում Չինաստանի և ԵՄ-ի նկատմամբ, որոնք շարունակում են մնալ ռուսական նավթի խոշորագույն գնորդները։ Միևնույն ժամանակ, վարչապետը հայտարարել է, որ Հնդկաստանը պատրաստ է վճարել բարձր գին և պաշտպանել իր ազգային շահերը՝ ներառյալ ռուսական հումքի մատակարարումների շարունակությունը։