Կամչատկայում վտանգավոր հրաբխային ակտիվություն է գրանցվել

Կամչատկայի թերակղզում ակտիվացել է Մուտնովսկի հրաբուխը։ Այս մասին հայտնել է Ռուսաստանի գիտությունների ակադեմիայի միասնական երկրաֆիզիկական ծառայության Կամչատկայի մասնաճյուղի մամուլի ծառայությունը։

Աղբյուրի փոխանցմամբ՝ գիտնականներին հաջողվել է գրանցել հրաբխի վրա ջերմային անոմալիա, այդ իսկ պատճառով այն ստացել է դեղին վտանգի կոդ։ Մասնագետները բացատրել են, որ հնարավոր չէ կանխատեսել Մուտնովսկու ժայթքումը և անցկացնել դրա սեյսմիկ մոնիթորինգը՝ ուժեղ երկրաշարժերի կիզակետային գոտիներից հետցնցումների անընդհատ հոսքի պատճառով։

«Հաշվի առնելով այս հրաբխի վերջին սեյսմիկ ակտիվացումը, ինչպես նաև թերակղզում գտնվող մի շարք այլ հրաբուխների սեյսմոգեն ակտիվացումը, խիստ անցանկալի է այցելել այն։ Նույնիսկ խառնարան տանող ճանապարհի մասին մտածելն այժմ լիակատար խելագարություն է», - զգուշացրել է Ռուսաստանի գիտությունների ակադեմիայի միասնական երկրաֆիզիկական ծառայության մամուլի ծառայությունը։