Ռուսաստանը և Ադրբեջանը խորացնում են տնտեսական համագործակցությունը

ՌԴ փոխվարչապետ Ալեքսեյ Օվերչուկը հայտարարել է, որ այս տարվա հունվար-մայիս ամիսներին Ռուսաստանի և Ադրբեջանի փոխհաշվարկներում ռուբլու բաժինը կազմել է 79,8 տոկոս։ Նրա խոսքով՝ երկու երկրների համագործակցության առաջնահերթ ոլորտներն են էներգետիկան, տրանսպորտային կապերի զարգացումը, ինչպես նաև արդյունաբերական և գյուղատնտեսական ծրագրերը։

«Փոխադարձ առևտրում մենք վստահորեն հենվում ենք ազգային արժույթների վրա», — ընդգծել է Օվերչուկը՝ Աստրախանում կայացած միջկառավարական տնտեսական հանձնաժողովի նիստում։ Նա հավելել է, որ կողմերը նախատեսել են հստակ ուղղություններ՝ համատեղ աշխատանքի շարունակական զարգացման համար։

Ավելի վաղ Ադրբեջանի Կենտրոնական բանկի ղեկավար Տալեհ Կյազիմովը նշել էր, որ Ռուսաստանի հետ հարաբերություններում առաջացած սառնությունը չի անդրադարձել առևտրաշրջանառության վրա։ Ըստ պաշտոնական տվյալների՝ 2025-ի առաջին կիսամյակում երկու երկրների միջև ապրանքաշրջանառությունը աճել է 16,2 տոկոսով և հասել 2,52 միլիարդ դոլարի։