Ռուս զինվորականն ապաստան է խնդրել Նորվեգիայից

Ռուս զինծառայողը Նորվեգիայում ապաստան ստանալու դիմում է ներկայացրել։ Այս մասին հայտնում է Dagbladet պարբերականը։

Ոստիկանության հետ զրույցում զինվորականը խոստովանել է, որ անօրինական կերպով երկիր է մուտք գործել Ֆիննմարկի Գրենսե-Յակոբսելվ նավահանգստով: Փաստաբան Թրոնդ Բիթին հայտարարել է՝ տղամարդը ապաստան է խնդրել այն բանից հետո, երբ սահմանը ոտքով հատել է՝ անցնելով ցանկապատով:

«Սահմանը հատելուց հետո նա ինքը փորձել է տեղում կապվել Նորվեգիայի իշխանությունների հետ», - հստակեցրել է իրավաբանը: Միևնույն ժամանակ, փաստաբանը հաստատել է՝ տղամարդը նախկինում ծառայել է ռուսական բանակում և եղել է Ուկրաինայում: Այժմ զինվորականին հարցաքննում են Նորվեգիայի իշխանությունները։