ԱԹՍ–ները պարալիզացրել են Ռուսաստանում օդանավակայանների աշխատանքը

ՌԴ Լիպեցկի և Վորոնեժի մարզերում հայտարարվել է անօդաչու թռչող սարքերի հարձակման սպառնալիք, գրում են ռուսական լրատվամիջոցները։ «Լիպեցկի մարզում հայտարարվել է «ԱԹՍ–ների հարձակման սպառնալիքի» կարմիր մակարդակ», - ասվում է Ռուսաստանի արտակարգ իրավիճակների նախարարության տելեգրամյան ալիքում հրապարակված հաղորդագրության մեջ։

ՌԴ Վորոնեժի մարզի ղեկավարը նույնպես զգուշացրել է բնակիչներին տարածաշրջանում անօդաչու թռչող սարքերի հնարավոր հարձակման մասին և կոչ է արել հանգստություն պահպանել։

«Հակաօդային պաշտպանության ուժերը պատրաստ վիճակում են։ Աշխատեք դուրս չգալ և հեռու մնալ պատուհաններից։ Հետևեք Ռուսաստանի արտակարգ իրավիճակների նախարարության կամ մարզային կառավարության հետագա ծանուցումներին», - ասվում է հայտարարության մեջ։

Բացի այդ, շաբաթ օրը Ռոսավիացիան հայտնել է, որ Կազանի օդանավակայանը ժամանակավորապես դադարեցրել է ինքնաթիռների մեկնումն ու ժամանումը։ Սահմանափակումները մտցվել են թռիչքների անվտանգությունն ապահովելու համար։

Նմանատիպ միջոցառումներ են գործում Կալուգայի, Նիժնի Նովգորոդի, Պենզայի և Սանկտ Պետերբուրգի օդանավակայաններում։