Երկիր.«ՀՀԿ-ի ախորժակը»

 Երկիր օրաթերթն այսօր գրում է` «ՀՀԿ–ական Գագիկ Մելիքյանը ողջունեց Հակ՝ արտահերթ նախագահական և խորհրդարանական ընտրությունների պահանջից հրաժարվելու փաստը, նաև հայտարարեց, թե շուտով Կոնգրեսը նաև Սերժ Սարգսյանի հրաժարականի պահանջից կհրաժարվի, քանի որ դրա համար հիմքեր չկան։ Իսկ թե ովքե՞ր կլինեն հաջորդ գումարման Ազգային ժողովում, հանրապետական պատգամավորի պատասխանը մեկն է ու միակը. «ՀՀԿ–ն, նորից ՀՀԿ–ն։ Մենք ձգտելու ենք բացարձակ մեծամասնության ու հասնելու ենք դրան»։ Միայն լրագրողների դիտարկումից հետո, թե դա ճահճացման կհանգեցնի, Գագիկ Մելիքյանը նշեց նաև այլ անուններ. կցանկանար տեսնել նաև ԲՀԿ–ին, Դաշնակցությանը և ՕԵԿ–ին, իսկ ժառանգության անունը չնշեց, քանի որ այս կուսակցությունն այնքան էլ ակտիվ չէ վերջին շրջանում… Ուստի, Մելիքյանը ենթադրել է, թե Ժառանգության ներկայացուցիչներն էլ չեն ուզում լինել խորհրդարանում… Իսկ ՀԱԿ–ը կհայտնվի հաջորդ գումարման Ազգային Ժողովում, եթե ակտիվ լինի։ «Վերջին նստացույցն ազդեց ՀԱԿ–ի վարկանիշի վրա»,– ասաց Գագիկ Մելիքյանը՝ նշելով, թե երկխոսությունն այդ վարկանիշի վրա դրական ազդեցություն էր ունեցել, իսկ դրա առկախումը՝ ոչ։ Նա հայտարարեց, որ իրենց առջև դրված նվազագույն խնդիրը խորհրդարանական ընտրությունների ընթացքում բացարձակ մեծամասնություն դառնալն է, առավելագույնը՝ 2013-ի նախագահական ընտրություններում Սերժ Սարգսյանի վերընտրվելը։ Անդրադառնալով Հանրապետական կուսակցության գործադիր մարմնի վերջին նիստին՝ պատգամավորը նշեց, որ դրա ընթացքում քննարկվել են ներկուսակցական և ներքաղաքական հարցեր, քննարկումը շարունակվելու է հաջորդ նիստի ընթացքում։ Ներքաղաքական խնդիրների համատեքստում քննարկվել է նաև ԲՀԿ-ի հարցը։ «Գոյություն ունի կոալիցիոն հուշագիր, որը գործում է, և մինչ օրս կոալիցիայից դուրս գալու հայտ որևէ կուսակցություն չի ներկայացրել»,– ասաց պատգամավորը՝ նշելով, սակայն, որ որևէ քաղաքական կոալիցիա հավերժ չէ։ Անդրադառնալով հարցին, թե ինչու՞ ԲՀԿ–ն պաշտոնապես չի հայտարարում, որ նախագահական ընտրությունների ընթացքում սատարելու է Սերժ Սարգսյանին, Գագիկ Մելիքյանը նշեց, թե ավելի պաշտոնապես պատասխան քան ստորագրված հուշագիրն է, գոյություն չունի, իսկ բանավոր խոսքերը պետք չէ լուրջ ընդունել»։