Իսրայելը հարվածել է Գազայի Նասեր հիվանդանոցին․ զոհվել է առնվազն 20 մարդ, այդ թվում՝ հինգ լրագրող

Օգոստոսի 25-ին Իսրայելի բանակը հարվածել է Գազայի գոտու հարավում գտնվող Նասեր հիվանդանոցին, ինչի հետևանքով զոհվել է առնվազն 20 մարդ։ Զոհերի թվում են հինգ լրագրողներ, որոնք աշխատում էին Reuters, Associated Press, Al Jazeera և այլ միջազգային լրատվամիջոցների համար։

Առաջին հարվածի ժամանակ սպանվել է Հուսսամ ալ-Մասրին, Reuters-ի օպերատորը, որը վարում էր հիվանդանոցի տանիքին տեղակայված ուղիղ հեռարձակման կետ։ Ավելի ուշ երկրորդ հարվածից զոհվել են նաև լրագրողներ Մարիամ Աբու Դաղգան (AP), Մոհամմեդ Սալաման (Al Jazeera), Մոազ Աբու Տահան և Ահմեդ Աբու Ազիզը։ Reuters-ի լուսանկարիչ Հաթեմ Խալեդը վիրավորվել է։ Վկաների խոսքով՝ երկրորդ հարվածը տեղի է ունեցել այն ժամանակ, երբ փրկարարներն ու լրագրողները շտապել էին օգնության։

Իսրայելի բանակը հաստատել է հարվածը Նասեր հիվանդանոցի տարածքին և հայտարարել հետաքննության մեկնարկի մասին՝ ընդգծելով, որ «չի թիրախավորում լրագրողներին»։ Միջազգային լրատվամիջոցները խորը վշտով են արձագանքել կորուստներին։ Պաղեստինյան լրագրողների միությունը հայտարարել է, որ Իսրայելի գործողությունները «բաց պատերազմ են ազատ մամուլի դեմ»։ Միության տվյալներով՝ 2023-ի հոկտեմբերի 7-ից ի վեր Գազայում սպանվել է ավելի քան 240 պաղեստինցի լրագրող։