Հնդկաստանը կկրճատի ռուսական նավթի գնումները

Bloomberg-ի տվյալներով՝ Հնդկաստանի պետական և մասնավոր նավթավերամշակող գործարանները առաջիկա շաբաթներին կկրճատեն ռուսական նավթի գնումները շուրջ 20%-ով՝ հասցնելով օրական ծավալը մինչև 1,4–1,6 մլն բարել։ Պատճառը ԱՄՆ-ի նախագահ Դոնալդ Թրամփի որոշումն է՝ 27 օգոստոսից բարձրացնել հնդկական ապրանքների մաքսատուրքերը մինչև 50%, ինչը կազդի շուրջ 85 միլիարդ դոլարի արտահանման վրա։

Թրամփը մաքսատուրքերը բացատրել է Հնդկաստանի կողմից ռուսական նավթի գնումներով, որոնք ըստ նրա՝ աջակցում են Մոսկվայի ռազմական բյուջեին։ Հնդկաստանը գնալով փոքրացնում է ներմուծումը՝ վերջին չորս ամիսներին ցուցադրելով անկում։ Աղբյուրները նշում են, որ այս քայլը մի կողմից համարվում է զիջում Վաշինգտոնին, սակայն մյուս կողմից՝ հստակ ուղերձ է, որ Նյու Դելիի և Մոսկվայի հարաբերությունները չեն խզվելու։

Հնդկաստանի ԱԳ նախարար Սուբրամանյամ Ջայշանկարը հիշեցրել է, որ մինչ ամերիկյան մաքսատուրքերի բարձրացումը Վաշինգտոնը երբեք չէր պահանջել դադարեցնել ռուսական նավթի գնումները։ Նրա խոսքով՝ այդ գործարքները նպաստում են համաշխարհային շուկայի կայունությանը և համապատասխանում են Հնդկաստանի շահերին։ Նա նաև քննադատել է Եվրոպային՝ ընդգծելով, որ եթե ԵՄ-ն խնդիր ունի, ապա «կարող է պարզապես չգնել»։