Չինաստանը պատրաստվում է ցուցադրել ԱՄՆ-ին սպառնալու ունակ նոր զինատեսակներ

Bloomberg-ը հայտնում է, որ Չինաստանը պատրաստվում է սեպտեմբերի 3-ին կայանալիք ռազմական շքերթին ցուցադրել նորագույն զինատեսակներ, որոնք ունակ են հարվածներ հասցնել ԱՄՆ-ին։

Անալիտիկները Open Nuclear Network կազմակերպությունից, ուսումնասիրելով արբանյակային լուսանկարները, արձանագրել են Չինաստանի զինանոցում նոր ռազմական տեխնիկա․ հակաօդային պաշտպանության համակարգեր, թևավոր հրթիռներ, հրետանի և ռակետային կայանքներ։ Նշվում է, որ այդ զենքերը նախատեսված են շքերթի ընթացքում ցուցադրելու համար՝ նվիրված Ճապոնիայի նկատմամբ հաղթանակի 80-ամյակին և Երկրորդ համաշխարհային պատերազմի ավարտին։

Ըստ փորձագետների՝ Պեկինը ցանկանում է ոչ միայն ռազմական ուժի ցուցադրությամբ ազդել արտաքին աշխարհին, այլև ընդգծել իր աճող ազդեցությունն ու աշխարհաքաղաքական հավակնությունները համաշխարհային անվտանգության համակարգում։