General Motors-ը հետ է կանչում ավելի քան 23,500 Corvette ԱՄՆ-ում՝ վառելիքի արտահոսքի պատճառով

General Motors ընկերությունը ԱՄՆ-ում հետ է կանչում ավելի քան 23,500 Chevrolet Corvette ավտոմեքենա՝ վառելիքի արտահոսքի վտանգի պատճառով։ Ինչպես հայտնել է Ավտոմայրուղիների ազգային անվտանգության վարչությունը (NHTSA), խնդիրը կապված է վառելիքի լցման ժամանակ արտահոսքի հավանականության հետ․ այն կարող է կուտակվել բաքի կափարիչի հատվածում և, ընկնելով տաք շարժիչի կամ արտանետման համակարգի վրա, առաջացնել հրդեհ։

Հետաքննության ընթացքում «Դետրոյթի լեգենդար ավտոարտադրողը» հայտնաբերել է առնվազն չորս դեպք, որոնք հնարավոր է կապված են այս դեֆեկտի հետ։ Նշվել է նաև, որ երկու դեպքերում դեր են խաղացել անսարք բենզալցակայանի պոմպերը։ Որպես լուծում՝ դիլերները կտեղադրեն հատուկ պաշտպանիչ վահանակ, որը կկանխի վառելիքի արտահոսքը։

Հետկանչը վերաբերում է 2023-2025 թվականների Corvette մոդելներին, ինչպես նաև 2026-ի Coupe և Convertible տարբերակներին։ NHTSA-ն գնահատում է, որ հետկանչված մեքենաների մոտավորապես 0,1 տոկոսն ունի իրականում այս խնդիրն։