Նորվեգիայի հսկա կենսաթոշակային ֆոնդը վաճառեց Caterpillar-ի բաժնետոմսերը Գազայի պատճառով

Աշխարհի ամենախոշոր պետական կենսաթոշակային ֆոնդը՝ Նորվեգիայի Government Pension Fund Global (GPFG)-ը, վաճառել է ամերիկյան Caterpillar ընկերության բաժնետոմսերը։ Որոշումը կայացվել է Նորվեգիայի Կենտրոնական բանկի ենթակառույց NBIM-ի կողմից՝ Էթիկայի խորհրդի առաջարկությամբ, որն ուսումնասիրում է միջազգային իրավունքի խախտումների հետ կապված բիզնես-գործունեությունը։

Խորհրդի հայտարարությամբ՝ Caterpillar-ի արտադրանքը օգտագործվում է «մասշտաբային և համակարգված խախտումների» համար Գազայում և Արևմտյան ափում։ Խոսքը, մասնավորապես, վերաբերում է իսրայելական կողմի կողմից բուլդոզերների կիրառմանը՝ պաղեստինյան գույքը ոչնչացնելու նպատակով։

Ըստ Financial Times-ի, ֆոնդը կես տարվա արդյունքներով Caterpillar-ում ուներ շուրջ 2,1 միլիարդ դոլարի բաժնետոմս՝ լինելով ընկերության 10 խոշորագույն բաժնետերերից մեկը։ Ավելի վաղ՝ օգոստոսին, Նորվեգիայի ֆոնդը արդեն հրաժարվել էր 11 իսրայելական ընկերություններից և դադարեցրել էր բոլոր պայմանագրերը երկրի արտաքին կառավարչական ընկերությունների հետ։