Կոնֆիսկացիան վտանգավոր է համակարգային հետևանքներով. Բելգիայի վարչապետը՝ ՌԴ ակտիվների մասին

Բելգիայի վարչապետ Բարտ դե Վևերը զգուշացրել է, որ Ռուսաստանի սառեցված ակտիվների հնարավոր կոնֆիսկացիան կարող է բերել լուրջ համակարգային հետևանքների։ Նրա խոսքերը փոխանցում է ՏԱՍՍ-ը։ Վարչապետը նշել է, որ այս գումարներին չդիպչելը այժմ «խելացի քայլ» կլինի, քանի որ դրանց բռնագրավումը իրավական բարդությունների է բախվելու։

Դե Վևերի խոսքով՝ եթե Եվրամիությունը որոշի բռնագրավել օտարերկրյա սուվերեն միջոցներ, ապա այլ երկրներ կսկսեն դուրս բերել իրենց կապիտալը ԵՄ-ից։ Այդ պատճառով, ըստ նրա, մինչև խաղաղության մասին բանակցությունների մեկնարկը, նման հարց քննարկելը ժամանակավրեպ է։

Բելգիական Euroclear դեպոզիտարի տվյալներով՝ 2025 թվականի առաջին եռամսյակում ռուսական սառեցված ակտիվներից ստացված եկամուտները տարեկան կտրվածքով նվազել են 7,5 տոկոսով։ Դեպոզիտարիայի ղեկավար Վալերի Ուրբենն իր հերթին նախազգուշացրել է, որ ԵՄ-ի կողմից այդ միջոցների ներդրումը ռիսկային նախագծերում, իբր շահույթը մեծացնելու համար, կարող է հավասարվել էքսպրոպրիացիայի և վտանգել կենտրոնական դեպոզիտարիայի հիմնական դերը։