Թրամփի մաքսատուրքերը ջնջեցին Հնդկաստանի ռուսական նավթից ստացած շահույթը

Հնդկաստանը վերջին երեք տարում շուրջ 17 միլիարդ դոլար խնայել էր՝ էժան ռուսական նավթի ներկրումների հաշվին, սակայն ԱՄՆ նախագահ Դոնալդ Թրամփի սահմանած մինչև 50% հավելյալ մաքսատուրքերը սպառնում են ջնջել այդ ողջ շահույթը։ Ըստ Global Trade Research Initiative-ի՝ հնդկական արտահանումները դեպի ԱՄՆ կարող են կրճատվել ավելի քան 40%-ով կամ մոտ 37 միլիարդ դոլարով արդեն այս ֆինանսական տարում։ Ամենաուժեղ հարվածը կհասնի աշխատատար ճյուղերին՝ տեքստիլին, ոսկերչությանը և թանկարժեք քարերի մշակմանը։

Վերլուծաբանների գնահատմամբ՝ այս քայլը լուրջ քաղաքական հետևանքներ կունենա վարչապետ Նարենդրա Մոդիի համար՝ աշխատատեղերի զանգվածային կորստի վտանգի ֆոնին։ Հնդկաստանը փորձում է հավասարակշռել՝ չհրաժարվելով ռուսական նավթից, որն արդեն կազմում է իր ներկրումների մոտ 40%-ը, բայց միաժամանակ բաց չթողնելով հարաբերությունները Վաշինգտոնի հետ։ Ներքին հաշվարկներով՝ եթե Դելիան դադարեցնի ռուսական նավթի գնումները (մոտ 2 մլն բարել օրական), համաշխարհային գները կարող են աճել մինչև 200 դոլար մեկ բարելի դիմաց։

Նյու Դելին արդեն մեղադրել է Վաշինգտոնին երկակի ստանդարտների մեջ՝ նշելով, որ հենց ԱՄՆ-ն շարունակում է գնել ռուսական հումք, մինչդեռ պատժում է Հնդկաստանին։ Մինչև այժմ Մոդին հրապարակայնորեն չի արձագանքել մաքսատուրքերին, սակայն խոստացել է պաշտպանել գյուղատնտեսներին և նվազեցնել հարկերը՝ բարձրացնելով ներքին պահանջարկը։ Վերլուծաբանները զգուշացնում են, որ Թրամփի քայլերը կարող են ԱՄՆ-Հնդկաստան հարաբերությունները վերադարձնել իրենց ամենասառը փուլին 1998-ի պատժամիջոցներից հետո՝ բացասաբար ազդելով ոչ միայն առևտրի, այլև վիզաների և ՏՏ ոլորտի համագործակցության վրա։