Kia-ն կարող է բացել սեփական մարկետփլեյսը Ռուսաստանում

Հարավկորեական Kia Corporation-ը Ռուսաստանում ներկայացրել է հինգ ապրանքային նշանի գրանցման հայտ։ «Ռոսպատենտի» տվյալներով՝ դրանք ընդգրկում են ավտոմեքենաների առցանց վաճառք, ցուցահանդեսների կազմակերպում, գովազդային ծառայություններ, ինչպես նաև կահույքի և այլ ապրանքների առևտուր։ Դրանցից մեկը՝ «Kia Մարկետփլեյս», հուշում է ընկերության հնարավոր մտադրության մասին՝ աշխատել նաև առցանց առևտրի ոլորտում։

Փորձագետները նկատում են, որ այս քայլը կարող է վկայել Kia-ի նոր ռազմավարության մասին՝ ավտոմոբիլային շուկան համադրել թվային ծառայությունների հետ։ Մարկետփլեյսի գաղափարը կարող է դառնալ յուրահատուկ գործիք բրենդի համար՝ ամրապնդելու ներկայությունը և ներգրավելու նոր հաճախորդների։

Հունիսին Kia-ն արդեն գրանցել էր երկու ապրանքային նշան էլեկտրամեքենաների վաճառքի համար, իսկ ավելի վաղ շրջանառվում էին լուրեր ընկերության հնարավոր վերադարձի մասին Ռուսաստան։ Թեև պաշտոնական հաստատում դեռ չկա, «Kia Մարկետփլեյս»-ի նախաձեռնությունը դիտվում է որպես առաջին ակնհայտ ազդակ այդ ուղղությամբ։