ԱՄՆ-ին «վախեցնող» չինական «Ցզյույլան-3»-ի հնարավորությունները բացահայտվեցին

The National Interest պարբերականը հրապարակել է մանրամասներ Չինաստանի նոր միջմայրցամաքային բալիստիկ հրթիռի՝ JL-3 («Ցզյույլան-3») մասին։ Այս հրթիռները տեղակայված են սուզանավերում և ունեն ավելի քան 10 հազար կիլոմետր թռիչքային հեռավորություն, ինչը թույլ է տալիս Չինաստանին հարվածներ հասցնել ԱՄՆ կարևոր թիրախներին՝ գտնվելով սեփական ափամերձ անվտանգ գոտիներից։

Հոդվածում նշվում է, որ JL-3-ը, ունենալով միջմայրցամաքային հնարավորություններ և միաժամանակ բազմաբեկորային մարտագլխիկների կիրառման կարողություն, Չինաստանին ներկայացնում է որպես լուրջ մրցակից ԱՄՆ-ի և նրա դաշնակիցների համար։ Սա փոխում է ռազմական հավասարակշռությունը Ինդո-Խաղաղօվկիանոսյան տարածաշրջանում՝ հօգուտ Պեկինի։

Վերլուծաբանի կարծիքով՝ JL-3-ի առկայությունը Չինաստանի զինանոցում ստիպելու է Վաշինգտոնին վերանայել ուժերի տեղակայման որոշումները՝ հատկապես Թայվանի շուրջ լարվածության դեպքում։ ԱՄՆ-ում, ըստ նրա, կարող են վախենալ «ամբողջական վրեժից», որը տեսականորեն կարող է ապահովել Պեկինը։ Ավելի վաղ Bloomberg-ը հայտնել էր, որ Չինաստանը պատրաստվում է նոր հզոր զենք ցուցադրել Հաղթանակի 80-ամյակի զորահանդեսին։