Բացահայտվել է այլմոլորակայինների խորհրդավոր ազդանշանի գաղտնիքը

Գիտության պատմության մեջ ամենախորհրդավոր ռադիոազդանշաններից մեկը՝ հայտնի «Վա՜յ!»-ն, որը գրանցվել է Օհայոյի «Մեծ ականջ» ռադիոաստղադիտակի կողմից 1977 թվականին, կրկին հայտնվել է ուշադրության կենտրոնում: Հետազոտողների միջազգային խումբն առաջին անգամ մանրամասն համակարգչային վերլուծություն է անցկացրել սկզբնական տվյալների և պարզել, որ ազդանշանը շատ ավելի հզոր է, քան նախկինում կարծում էին: Աշխատանքի նախնական տարբերակը հրապարակվել է arXiv պորտալում:

72 վայրկյան տևողությամբ «Վա՜յ!» ազդանշանը պատահաբար գրանցվել է «Արտաերկրային բանականության որոնում» (SETI) ծրագրի շրջանակներում դիտարկումների ժամանակ: Դա նեղաշերտ ռադիոպայթյուն էր մոտ 1420 ՄՀց հաճախականությամբ՝ ճիշտ չեզոք ջրածնի ճառագայթման տիրույթում, որը համարվում է «տիեզերական ունիվերսալ կապի ալիք»: Ազդանշանն իր անունը ստացել է աստղագետ Ջերի Էհմանի գրառման շնորհիվ, որը, տեսնելով տպագրության վրա ֆոնի անսովոր ավելցուկ, եզրերին գրել է «Վա՜յ!»: Այդ ժամանակվանից ի վեր այն դարձել է այլմոլորակային քաղաքակրթությունների որոնման խորհրդանիշ:

Ժամանակակից տեխնոլոգիաների կիրառմամբ, հետազոտողները մշակել են արխիվային դիտարկումների ավելի քան 75 հազար էջ և հաճախականությունը 1420.4556-ից փոխել են մինչև 1420.726 ՄՀց: Բացի այդ, նոր գնահատականը ցույց է տվել, որ դրա հզորությունը մոտ 250 Յանսկի էր՝ նախկինում գնահատված 54–212-ի դիմաց: Սա «Վա՜յ!»-ն դարձնում է աստղագետների կողմից երբևէ գրանցված ամենաուժեղ ռադիոազդանշաններից մեկը։

Գիտնականները բացառել են մարդածին ծագման հնարավորությունը. մոտակայքում հեռուստակայաններ չէին գործում, արբանյակներ չկային, իսկ Լուսինը գտնվում էր Երկրի մյուս կողմում: Ամենահավանական աղբյուրը համարվում է չեզոք ջրածնի ամպը, սակայն նախկինում ոչ մի հայտնի ամպ նման հզորություն չի ցուցաբերել:

Թարգմանությունը՝  Lurer.com-ի