«Նաիրիտի» քիմիական թափոնների վնասազերծման համար 1,5 մլն դոլար դրամաշնորհ կտրամադրվի

Հայաստանի Հանրապետության ու Վերակառուցման և զարգացման միջազգային բանկի միջև 2025 թվականի հունիսի 27-ին ստորագրվել է «Նաիրիտ» գործարանի բնապահպանական վերականգնման և ռեգեներացիայի ծրագրի նախապատրաստման համար դրամաշնորհի նամակ-համաձայնագիր, որով «Նաիրիտ» քիմիական գործարանում առկա սարք-սարքավորումների և քիմիական թափոնների վնասազերծման աշխատանքների իրականացման շրջանակներում Գործարանի տարածքի շրջակա միջավայրի բարելավման նպատակով առաջարկվել է ներդրումային գործառնությանն ուղղված դրամաշնորհի տրամադրում՝ 1,5 մլն ԱՄՆ դոլար ծավալով: Այս մասին որոշումն ընդունվեց կառավարության այսօրվա նիստում։

Գործունեության նպատակն է նպաստել գործարանից առաջացող հանրային առողջության և շրջակա միջավայրի ռիսկերը լուծելու համար նախատեսված առաջարկվող նախագծի նախապատրաստմանը:

Համաձայնագրով միջոցների առհանման վերջնաժամկետ է սահմանվել՝ 2026 թվականի դեկտեմբերի 31-ը։

Համաձայնագիրը Հայաստանի Հանրապետության պետական բյուջեի համար չի առաջացնում լրացուցիչ ֆինանսական պարտավորություններ: