Կառավարությունը կաջակցի տոմատի մածուկի արտադրման նպատակով 2000 տոննայից ավել լոլիկ մթերող տնտեսվարողներին

Հայաստանի կառավարությունը հաստատեց 2025 թվականի լոլիկի մթերումների գործընթացի կազմակերպման միջոցառումները։ 

Կառավարության նիստի ընթացքում հարցը զեկուցեց ՀՀ էկոնոմիկայի նախարար Գևորգ Պապոյանը։ 

Նախարարը նշեց, որ նախագծի ընդունումը պայմանավորված է ընթացիկ տարվա ընթացքում լոլիկի մթերման գործընթացին աջակցելու անհրաժեշտությամբ։ «2024 թվականին ամբողջ տարվա ընթացքում մթերվել է 15 հազար 200 տոննա լոլիկ, այնինչ 2025 թվականի օգոստոսի 28-ի դրությամբ՝ ավելի քան 8800 տոննա լոլիկ, որը շուրջ 5000 տոննայով գերազանցում է նախորդ տարվա նույն օրվա ցուցանիշը։ Տոմատի մածուկի արտադրման նպատակով լոլիկը մթերվում է 40-45 դրամով, իսկ արտադրված տոմատի մածուկի մեկ կիլոգրամի ինքնարժեքը կազմում է շուրջ 450 դրամ։ Վերջին տարիներին արձանագրվել է տոմատի մածուկի միջազգային գների անկում, և տեղական արտադրության տոմատի մածուկը գնային առումով մրցունակության խնդիր ունի ոչ միայն միջազգային, այլ նաև հայկական շուկայում։ Տոմատի մածուկի շուկայում ստեղծված իրավիճակում տեղական հումքով տոմատի մածուկ արտադրող տնտեսվարողները շահագրգռված չեն լոլիկի մթերումների իրականացմամբ։ Ըստ Էկոնոմիկայի նախարարության գնահատականների՝ ընթացիկ տարում առկա է շուրջ 7000 տոննա լոլիկի մթերման խնդիր»,- ներկայացրեց Պապոյանը։

Նախարարը մանրամասնեց՝ նախագծով առաջարկվում է 2025 թվականի լոլիկի մթերումների գործընթացի կազմակերպման համար տոմատի մածուկի արտադրության նպատակով լոլիկի մթերումներ իրականացնող տնտեսվարող սուբյեկտներին տրամադրել աջակցություն՝ հետևյալ պայմաններով. 

2000 տոննան ներառյալ  լոլիկի մթերումներ իրականացնող տնտեսվարողներին սուբսիդիա չի տրամադրվում։  

2000 տոննան գերազանցող մթերված լոլիկի յուրաքանչյուր 1 կիլոգրամի դիմաց տրամադրվում է 10 դրամի աջակցություն։ Աջակցության տրամադրման համար նախապայման է սահմանվում, որ մթերվող լոլիկի նվազագույն գինը չի կարող լինել 40 դրամից ցածր, և լոլիկի ամբողջ ծավալը պետք է մթերվի։ 

Միջոցառման շրջանակներում մթերումների գործընթացի ամենօրյա մշտադիտարկումը կատարվում է մարզպետարանների աշխատակազմի կողմից։ 

Պապոյանի խոսքով՝ նախագծի ընդունման դեպքում տեղական արտադրության տոմատի մածուկի ինքնարժեքը կմոտենա ներմուծվողի մաքսային արժեքին, զգալիորեն կավելանա մրցունակության մակարդակը, ինչի արդյունքում կմթերվի 7000 տոննա լոլիկ, կլուծվեն ընթացիկ տարվա լոլիկի մթերման կազմակերպման գործընթացում առկա բոլոր խնդիրները։ 

Վարչապետ Նիկոլ Փաշինյանն էլ ընդգծեց, որ ծրագիրը իրականացնելու անհրաժեշտությունն առաջացել է լոլիկի առատ բերքի առումով։ «Նախկինում առիթ ունեցել եմ ասելու՝ երբ բերքը քիչ է լինում, մեզ համար խնդիր է, բերքը շատ է լինում՝ մեզ համար խնդիր է։ Եվ մենք պետք է այդ խնդիրները պետք է փորձենք տրանսֆորմացնել ինչ-որ ավելի զարգացնող և ստեղծարար երևույթի»,- ասաց Փաշինյանը։