Հնդկաստանը սեպտեմբերին կավելացնի ռուսական նավթի գնումները՝ անտեսելով ԱՄՆ ճնշումը

Reuters-ի աղբյուրների տեղեկացմամբ՝ Հնդկաստանի վերամշակողները սեպտեմբերին նախատեսում են 10-20%-ով ավելացնել ռուսական նավթի գնումները՝ օրական մինչև 300 հազար բարելով։ Ռուսաստանը կտրուկ իջեցրել է գները, քանի որ ուկրաինական անօդաչուների հարձակումները շարքից հանել են երկրի մի շարք նավթավերամշակող գործարաններ։ Այսպիսով, Մոսկվան ստիպված է մեծ ծավալով հում նավթ վաճառել արտահանման շուկայում։

Վաշինգտոնը սրել է ճնշումը Նյու Դելիի վրա․ Դոնալդ Թրամփի վարչակազմը բարձրացրել է հնդկական ապրանքների մաքսատուրքը մինչև 50%՝ Ռուսաստանից նավթ գնելու պատճառով։ Միևնույն ժամանակ, Հնդկաստանի վարչապետ Նարենդրա Մոդին շարունակում է զարգացնել ռազմավարական կապերը Մոսկվայի հետ՝ հանդիպելով Վլադիմիր Պուտինին։ Հնդիկ պաշտոնյաները մեղադրում են Արևմուտքին երկակի չափանիշների մեջ՝ ընդգծելով, որ ԵՄ-ն և ԱՄՆ-ն դեռ միլիարդավոր դոլարների ռուսական ապրանք են գնում։

Հնդկաստանը մնում է ռուսական ծովային նավթի ամենամեծ գնորդը, որը կազմում է երկրի նավթի պահանջարկի շուրջ 40%-ը։ Վերլուծաբանների խոսքով՝ առանց հստակ արգելքի կամ համաշխարհային փոփոխությունների, ռուսական նավթը կմնա Հնդկաստանի էներգետիկայի հիմնական բաղադրիչ։ Եթե Նյու Դելին կտրուկ դադարեցնի ներմուծումները, դա կարող է կրճատել համաշխարհային առաջարկը մեկ միլիոն բարելով և կարճաժամկետում բարձրացնել գինը մինչև 100 դոլար մեկ բարելի համար։