ՌԴ Պետդումայում Զելենսկու դիմումը Չինաստանին ու Հունգարիային համարեցին «փիառ»

ՌԴ Պետդումայի միջազգային հարցերի կոմիտեի առաջին փոխնախագահ Ալեքսեյ Չեպան Զելենսկու կոչը՝ ուղղված Չինաստանին ու Հունգարիային, գնահատել է որպես «փիառ-քայլ»։ Նա պնդել է, որ Ռուսաստանի հրթիռակոծությունները լինում են միայն ի պատասխան Ուկրաինայի գործողություններին և հիմնականում թիրախավորում են ռազմական արդյունաբերական օբյեկտներ։

Չեպան նշել է, որ եթե Ուկրաինան հարվածում է Ռուսաստանի տարածքին, օրինակ՝ Ռոստովի մարզին, ապա Մոսկվան տալիս է համարժեք պատասխան։ Նրա խոսքով՝ Կիևը նորմալ է համարում իր հարվածները քաղաքացիական օբյեկտներին, մինչդեռ Ռուսաստանը գործում է «պաշտպանական տրամաբանությամբ»։

Զելենսկին ավելի վաղ դիմել էր Չինաստանին և Հունգարիային՝ պահանջելով դատապարտել Կիևի վրա կատարված հարձակումները և սատարել Ռուսաստանի դեմ նոր խիստ պատժամիջոցներին։ Դեպուտատը նշեց, որ ուկրաինացի նախագահը դիմել է հենց այդ երկրներին՝ հաշվի առնելով նրանց առանձնահատուկ դիրքորոշումը հակամարտության հարցում։