Ռուսական գազի արտահանումը Չինաստան աճել է մոտ 30 տոկոսով

2025-ի առաջին ութ ամսվա արդյունքներով ռուսական գազի մատակարարումները Չինաստան աճել են 28,3 տոկոսով՝ 2024-ի նույն ժամանակահատվածի համեմատ։ Այս մասին հայտնել է Գազպրոմ-ը՝ ընդգծելով, որ արտահանումը կատարվում է ոչ միայն պայմանագրային պարտավորությունների շրջանակում, այլև ավելին։ Ընկերությունում սա որակել են որպես «վստահելի աշխատանքի» ապացույց արտաքին շուկաներում։

Մատակարարումները հիմա իրականացվում են «Սիբիրի ուժը» գազատարով, որի տարեկան թողունակությունը կազմում է 38 միլիարդ խորանարդ մետր։ 2027-ին նախատեսվում է գործարկել նաև նոր՝ Դ հեռավորարևելյան երթուղին, որը կավելացնի ևս մոտ 10 միլիարդ։

Սակայն փորձագետների գնահատմամբ՝ նույնիսկ այս աճով Չինաստանը չի կարող մոտ ապագայում փոխհատուցել Եվրոպական շուկայի կորստի չափերը։ Համեմատության համար՝ մինչև պատժամիջոցները, 2021-ին, Ռուսաստանը Եվրոպա էր մատակարարում շուրջ 155 միլիարդ խորանարդ մետր գազ։ Իսկ «Սիբիրի ուժը-2» նախագծի շուրջ բանակցությունները շարունակում են մնալ անորոշ՝ Պեկինի պահանջների պատճառով գնի և ծավալների հարցում։