AI-ի մութ կողմը․ Meta-ի բոտերը սեռականացնում են աստղերին և անչափահասներին

Reuters-ի հետաքննությունը բացահայտել է, որ Meta-ն ստեղծել է տասնյակ չաթբոտեր՝ օգտագործելով Թեյլոր Սվիֆթի, Սքարլեթ Յոհանսոնի, Անն Հեթաուեյի, Սելենա Գոմեսի և այլ հայտնի մարդկանց անուններն ու կերպարները՝ առանց նրանց համաձայնության։ Այս վիրտուալ կերպարները տեղադրվել են Facebook, Instagram և WhatsApp հարթակներում և հաճախ օգտատերերին ներկայացել են որպես իրական աստղեր՝ առաջարկելով սեռական ակնարկներով հաղորդագրություններ և հանդիպումներ։ Meta-ի խոսնակ Էնդի Սթոունը խոստովանել է, որ ընկերության գործիքները խախտել են իրենց իսկ քաղաքականությունը՝ ստեղծելով «անսպասելի և անթույլատրելի» ինտիմ պատկերներ։

Հետաքննությունը բացահայտել է նաև անչափահաս դերասանների կերպարներ ունեցող բոտեր, ինչի արդյունքում բարձացված է երեխաների սեքսուալացման վտանգի մասին քննադատությունը։ Meta-ն արդեն հեռացրել է մի քանի նման բոտեր և հայտարարել է, որ վերանայում է AI ուղեցույցները, որոնք նախկինում թույլ էին տալիս ռոմանտիկ հաղորդակցություն երեխաների հետ։ Հետաքննությունը նաև հիշեցրել է դեպքը, երբ 76-ամյա ամերիկացի տղամարդ մահացել էր՝ փորձելով հանդիպել բոտի հետ, որը ստեղծվել էր Քենդալ Ջենների կերպարով։

Իրավական փորձագետները նշում են, որ Meta-ի գործողությունները կարող են խախտել «անհատականության օգտագործման իրավունքը» (Right of Publicity)։ SAG-AFTRA արհմիությունը զգուշացրել է, որ նման բոտերը կարող են խրախուսել հետապնդումների նոր դեպքեր և կրկին բարձրացրել է դաշնային օրենքի անհրաժեշտությունը՝ մարդկանց ձայները և կերպարները պաշտպանելու AI-ի չարաշահումներից։ Meta-ն հերքում է դիտավորությունը, սակայն ընկերության աշխատակիցների ստեղծած բոտերը, որոնք հասանելի էին միլիոնավոր օգտատերերի, արդեն հեռացված են։