Գուտերեշը կարևորել է Չինաստանի դերը բազմակողմ դիվանագիտության պահպանման հարցում

ՄԱԿ-ի գլխավոր քարտուղար Անտոնիու Գուտերեշը Չինաստանի նախագահ Սի Ցզինպինի հետ հանդիպման ժամանակ հայտարարել է, որ Պեկինի աջակցությունը բազմակողմ միջազգային համակարգին «հիմնարար նշանակություն ունի»։ Հանդիպումը կայացել է Տյանցզինում՝ Շանհայյան համագործակցության կազմակերպության գագաթնաժողովի շրջանակում, որտեղ հավաքվել են նաև Ռուսաստանի նախագահ Վլադիմիր Պուտինը և Ասիայի ու Մերձավոր Արևելքի առաջնորդներ։

Գուտերեշը նշել է, որ աշխարհում ձևավորվում են քաղաքական նոր մոտեցումներ, որոնք հաճախ նմանվում են «շոուի, այլ ոչ թե լուրջ դիվանագիտական աշխատանքի»։ Նրա խոսքով՝ Չինաստանը դարձել է բազմակողմ համակարգի «հիմնական սյուներից մեկը», և ՄԱԿ-ը բարձր է գնահատում այդ դերակատարությունը։

Ի պատասխան Սի Ցզինպինը հայտարարել է, որ Չինաստանը պատրաստ է խորացնել համագործակցությունը ՄԱԿ-ի հետ, աջակցում է դրա կենտրոնական դերին միջազգային հարաբերություններում և պատրաստ է «համատեղ պատասխանատվություն կիսել համաշխարհային խաղաղության ու զարգացման պահպանման համար», փոխանցում է Reuters-ը։