ՌԴ ԶՈՒ ԳՇ պետը հայտարարել է, որ Ուկրաինայում ռազմական գործողությունները կշարունակվեն

Ռուսաստանի Դաշնության զինված ուժերի գլխավոր շտաբի պետ Վալերի Գերասիմովը ամփոփել է գարուն-ամառ ռազմական գործողությունների արդյունքները և ներկայացրել զորքերի առաջիկա խնդիրները։ «Արմենպրես»-ի հաղորդմամբ՝ Գերասիմովի ելույթից տեսանյութը հրապարակել է ՌԴ պաշտպանության նախարարությունը։

Գերասիմովի խոսքով՝ Լուգանսկի մարզի 99,7 տոկոսը և Դոնեցկի մարզի շուրջ 79 տոկոսը գտնվում են ռուսական ուժերի վերահսկողության տակ։ Նա նշել է նաև, որ Զապորոժիեի 74 տոկոսը և Խերսոնի 76 տոկոսը ևս վերահսկվում է Ռուսաստանի կողմից։

Ըստ Գերասիմովի՝ ռուսական զորքերը շարունակել են առաջ շարժվել Սումիի, Խարկովի և Դնեպրոպետրովսկի մարզերում։ Մարտից ի վեր վերահսկողության տակ է անցել ավելի քան 3,5 հազար քառ. կմ տարածք և 149 բնակավայր։

Նրա խոսքով՝ գարուն-ամառ ժամանակահատվածում հարվածներ են հասցվել 76 ռազմական օբյեկտների։

Գերասիմովը ընդգծել է, որ Սումիի և Խարկովի մարզերում ռուսական կողմը շարունակում է իրականացնել անվտանգության գոտու ստեղծման գործընթաց։ Նա հավելել է, որ մի շարք ուղղություններով ռուսական զորքերը բարելավել են դիրքերը և վերահսկողության տակ վերցրել նոր բնակավայրեր։

Գլխավոր շտաբի պետը հայտարարել է, որ «հատուկ ռազմական գործողությունը» կշարունակվի։