Բելառուսը ակտիվորեն մասնակցում է նոր աշխարհակարգի ձևավորմանը․ Լուկաշենկո

Բելառուսը ակտիվորեն մասնակցում է նոր աշխարհակարգի ձևավորմանը։ Այս մասին հայտարարել է հանրապետության նախագահ Ալեքսանդր Լուկաշենկոն չինական «Xinhua News» գործակալությանը տված հարցազրույցում։

Նրա խոսքով՝ Համաշխարհային Հարավի երկրները գործում են իրենց շահերից ելնելով, կողմ են տարբեր հակամարտությունների խաղաղ կարգավորմանը, ինչպես նաև պաշտպանում են բոլոր երկրների մասնակցությունը համաշխարհային խնդիրների լուծմանը։

Այս ուժն արդեն ազդում է համաշխարհային կարգի վրա, և նրա դերը միայն կաճի, կարծում է Լուկաշենկոն։

«Բելառուսը, կիսելով համաշխարհային մեծամասնության սկզբունքներն ու տեսակետները, իրեն համարում է դրա անբաժանելի մասը և ակտիվորեն մասնակցում է նոր աշխարհակարգի ձևավորմանը», - ասել է Բելառուսի առաջնորդը՝ ընդգծելով, որ երկիրը միացել է ՇՀԿ-ին և դարձել է ԲՐԻԿՍ-ի գործընկեր՝ կոնկրետ առաջարկներով, որոնք արդյունքներ են բերում։

Նա հավելել է, որ Մինսկը ակնկալում է շարունակել փոխգործակցությունը Չինաստանի հետ։