Էրդողանը խոսել է Թուրքիայի` Ուկրաինայի հակամարտության կարգավորմանն ուղղված ջանքերի մասին

Թուրքիայի նախագահ Ռեջեփ Թայիփ Էրդողանը Չինաստանում իր ռուս գործընկեր Վլադիմիր Պուտինի հետ հանդիպման ժամանակ հայտարարել է, որ Ուկրաինայի հարցով Ստամբուլում կայացած բանակցությունները նպաստել են խաղաղ կարգավորմանը: Այս մասին ասվում է Էրդողանի գրասենյակի կողմից Ռուսաստանի նախագահի հետ հանդիպումից հետո տարածված հայտարարության մեջ, հաղորդում է ՏԱՍՍ-ը:

Էրդողանը նշել է, որ Թուրքիայի` Ուկրաինայում զինված հակամարտությանը վերջ դնելու և արդար ու երկարատև խաղաղություն հաստատելու ջանքերը շարունակվում են:

Քաղաքական գործիչը նաև նշել է, որ Թուրքիայի և Ռուսաստանի հարաբերությունները առևտրի, զբոսաշրջության, ներդրումների և էներգետիկայի ոլորտներում շարունակում են զարգանալ փոխադարձ հարգանքի և ընդհանուր շահերի հիման վրա:

Ինչպես հաղորդում է Թուրքիայի ղեկավարի գրասենյակը, Էրդողանը և Պուտինը նաև մտքեր են փոխանակել Մերձավոր Արևելքում և Անդրկովկասում տեղի ունեցող իրադարձությունների վերաբերյալ: