Լիտվայի նախագահը կոչ է արել խստացնել Ռուսաստանի դեմ պատժամիջոցները

Ուկրաինային տրամադրվող ռազմական օգնությունը պետք է մեծացվի, իսկ Ռուսաստանի դեմ պատժամիջոցները՝ խստացվեն։ Այս մասին հայտարարել է Լիտվայի նախագահ Գիտանաս Նաուսեդան Եվրահանձնաժողովի ղեկավար Ուրսուլա ֆոն դեր Լեյենի հետ համատեղ մամուլի ասուլիսում, որը հեռարձակվել է Եվրահանձնաժողովի կայքում։

Լիտվայի ղեկավարը ընդգծել է, որ հակառուսական պատժամիջոցների 19-րդ փաթեթը պետք է վերաբերի ռազմավարական ոլորտներին՝ միջուկային արդյունաբերությանը, նավթագազային ոլորտին, բանկային ոլորտին և ստվերային նավատորմին։

Խոսելով Ուկրաինայի անվտանգության երաշխիքների մասին՝ Նաուսեդան նշել է, որ դա ուժեղ ուկրաինական բանակ է՝ համակցված եվրոպական և տրանսատլանտյան մեծ ներկայության հետ։ Նրա խոսքով՝ Լիտվան պատրաստ է իր ներդրումն ունենալ այս հարցում։

Նա հավելել է, որ Ուկրաինայի անդամակցությունը Եվրամիությանը ապագայում ռազմավարական անհրաժեշտություն է և «Եվրոպայի բարոյական պարտականություն»։ Քաղաքական գործիչը կարծիք է հայտնել, որ հանրապետության անդամակցությունը ԵՄ-ին նաև Ուկրաինայի անվտանգության երաշխիք է․ դա պետք է տեղի ունենա մինչև 2030 թվականը։