Իրանը պատրաստ է ընդլայնել տարածաշրջանային համագործակցությունը․ Պեզեշքիան

Շանհայի համագործակցության կազմակերպության (ՇՀԿ) գագաթնաժողովում ելույթ ունենալով՝ Իրանի նախագահ Մասուդ Պեզեշքիանը նշել է, որ Իրանի Իսլամական Հանրապետությունը աջակցում է կոլեկտիվ համագործակցության ամրապնդմանն ու ժողովուրդների միջև ամուր կապերի հաստատմանն ուղղված նախաձեռնություններին։

Այդ նախաձեռնությունների շարքում նա առանձնացրել է.

Անվտանգության ոլորտում սպառնալիքներին և մարտահրավերներին հակազդելու մասնագիտացված կենտրոնների ստեղծումը։

Թմրանյութերի ապօրինի շրջանառության դեմ պայքարի կենտրոնի ստեղծումը։

Ճգնաժամային իրավիճակներում արագ արձագանքման մեխանիզմների մշակումը։

Ռազմավարական ուսումնասիրությունների կենտրոնի ստեղծումը։

Կազմակերպության պաշտոնական լեզուների տարածումը։

Պեզեշքիանը նաև ընդգծել է, որ Իրանը, իր եզակի աշխարհաքաղաքական և տարանցիկ դիրքի շնորհիվ, պատրաստ է ապահովել տարածաշրջանային համագործակցության ընդլայնման համար անհրաժեշտ հիմքը և շահագրգիռ երկրների համար հասանելիություն ապահովել իր տարածքներ։

Նա նշել է, որ «ձեռնարկված ջանքերի շնորհիվ Հնդկական օվկիանոսում գտնվող Չաբահար նավահանգիստը շուտով կմիանա Իրանի ազգային երկաթուղային ցանցին», ինչը կարևոր քայլ կլինի Չինաստանը, Կենտրոնական Ասիայի երկրները և Աֆղանստանը Հնդկական օվկիանոսին կապելու համար։ Նախագահը հավելել է, որ ներդրողները կարող են օգտվել տարբեր խթաններից և զեղչերից՝ այս նավահանգստում լոգիստիկ կենտրոններ զարգացնելու և հիմնելու համար։