Հեծանիվից մինչև շարասյուներ․ խոստացված փոփոխությունները մնացին PR արշավի մակարդակում

Վարչապետ Նիկոլ Փաշինյանը վերջին մեկուկես տարին հեծանվային արշավներ է կազմակերպել և քարոզել հեծանվային տրանսպորտը քաղաքացիների շրջանում։ Մասնավորապես՝ կառավարության անդամները մի փուլում սկսեցին հեծանիվ վարել և կազմակերպել հեծանվային զբոսանքներ, վարչապետի աշխատակազմի ղեկավար Արայիկ Հարությունյանն էլ մետրոյով էր երթևեկում։ Փաշինյանը հեծանիվ էր վարում ոչ միայն Հայաստանում, այլև Հայաստանից դուրս՝ Մոսկվայում, Գերմանիայում և այլուր։
 
Այս պատկերից կարող ենք ենթադրել, որ կատարվում է դրական փոփոխություն, որը խթան է առողջ ապրելակերպի և մատչելի կյանքի նորմալիզացման համար։ 

Սակայն մինչ օրս չկա ակնառու արդյունք՝ այս միջոցառումների համար պետական բյուջեից տրամադրված տասնյակ միլիոնների ծախսի դիմաց։ 

Մասնավորապես՝ հեծանվարշավի կազմակերպման համար բյուջեից տրամադրվել է 15 միլիոն դրամ, նաև, կառավարության որոշմամբ, հավելյալ 3 միլիոն 160 000 դրամ է հատկացվել վարչապետի աշխատակազմի «Հանրային կապերի և տեղեկատվական կենտրոն» ՊՈԱԿ-ին, որպեսզի ապահովվի «Tour de Sevan 2024» հեծանվարշավի հանրային իրազեկումը։ Ընդ որում, միջոցառման կազմակերպման համար գնումների մրցույթ չի հայտարարվել, և գնումն իրականացվել է մեկ անձից՝ հրատապ կարգով, այն դեպքում, երբ հեծանվարշավը վաղուց ծրագրված միջոցառում էր։ 

Դեռևս 2018 թվականի հոկտեմբեր ամսին, երբ հեծանվորդ ու հեծանվային մասնագետ Էմիլ Ասատրյանը սեփական ձեռքերով հավաքած հեծանիվը նվիրեց Նիկոլ Փաշինյանին, վերջինս գրել էր․ «Միայն թե՝  դա չեմ համարում իմ անձնականը, այլ ՀՀ վարչապետի առաջին ծառայողական հեծանիվը: Հույս ունեմ՝ զրահապատ է»։ 

2020 թվականից ի վեր Նիկոլ Փաշինյանին սպասարկող ավտոշարասյունը մեծացել է, և մինչ վարչապետի տեղաշարժի մեկնարկը, ոստիկանությունը կաթվածահար է անում երթևեկությունը այն փողոցներում, որոնցով պետք է անցնի շարասյունը։ ՀՀ վարչապետի աշխատակազմից պետական գաղտնիք են համարում  վարչապետին ուղեկցող մեքենաների քանակի մասին տեղեկատվությունը, խուսափում են կորտեժի սպասարկող բյուջեի ծախսը հրապարակել։

Հիշեցնենք, որ իշխանության սկզբնական շրջանում խոստանում էին, որ ծառայողական մեքենաների թիվը կնվազի։ 

2024 թվականին ԿԳՄՍ-ն հանրակրթական դպրոցների համար 6500 հեծանիվներ էր գնել 6 տարբեր ընկերություններից, յուրաքանչյուրը՝ 113 000 դրամով: Սակայն Երևանի և ՀՀ այլ քաղաքաների փողոցներում բացակայում են համապատասխան հեծանվուղիները, որոնք կապահովեն աշակերտների անվտանգ տեղաշարժը։ 

Վերջին անգամ վարչապետը հանրայնորեն հեծանիվ քշելու մասին խոսել է 2024 թվականի նոյեմբերի 14-ին և նշել․  «Ես կիրակի օրը, 50 տարեկան լինելով, 100 կմ հեծանիվ եմ քշել, տեսնում եմ՝ երիտասարդները կանգնած տրանսպորտի են սպասում. էս երեխեքին խի՞ չենք հուշում, չենք ասում՝ ինչի՞ եք մի ժամ կանգնել կանգառում, 10 կմ է, հեծանիվով գնացեք-եկեք»։

Այսինքն՝ մինչ օրս կառավարության վարած PR ռազմավարությունն արդյունք չի գրանցել։ Աշակերտները շարունակում են դասի հաճախել սեփական կամ տրանսպորտային միջոցներով՝ առանց երթևեկության ծանրաբեռնվածության էական թեթևացման։