Nestlé-ի գխավոր տնօրենը հեռացվել է գաղտնի հարաբերության պատճառով

Շվեյցարական սննդարդյունաբերական հսկա Nestlé-ն հայտնվել է ամենախորը կառավարման ճգնաժամում վերջին տասնամյակներում՝ աշխատանքից հեռացնելով գլխավոր տնօրեն Լորան Ֆրեյսին՝ ենթակայի հետ չհայտարարված «ռոմանտիկ հարաբերության» պատճառով։ Ֆրեյսին ընկերությունը ղեկավարեց ընդամենը մեկ տարի, իսկ նրա հեռացումը դարձավ Nestlé-ում մեկ տարվա ընթացքում երկրորդ գլխավոր տնօրենի կորուստը։ Նրա տեղը կզբաղեցնի Nespresso-ի ղեկավար Ֆիլիպ Նավրատիլը՝ փորձելով վերականգնել ներդրողների վստահությունը։

Հետաքննությունը սկսվել է այն բանից հետո, երբ ընկերության «Speak Up» ներքին հարթակում հաղորդումներ են ստացվել հնարավոր հարաբերության մասին։ Սկզբնական ստուգումները արդյունք չէին տվել, սակայն նոր տվյալները հանգեցրել են խորհրդի կողմից անկախ իրավաբանների ներգրավմամբ լայնածավալ քննության։ Nestlé-ն հաստատել է, որ Ֆրեյսին չի ստանա որևէ փոխհատուցում իր հեռացման դիմաց։ Նրա հեռացումը տեղավորվում է գլոբալ կորպորատիվ միջավայրում վերջին տարիներին աճող սկանդալների շարքում, երբ ընկերությունների բարձրաստիճան ղեկավարներ ստիպված են եղել հրաժարական տալ նմանատիպ հարաբերությունների պատճառով։

Nestlé-ի բաժնետոմսերը վերջին հինգ տարում կորցրել են մոտ մեկ երրորդը արժեքից, իսկ Ֆրեյսի պաշտոնավարության ընթացքում անկումը կազմել է 17 տոկոս։ Նորանշանակ Նավրատիլից ներդրողները ակնկալում են ծախսերի կրճատում, աշխատակիցների թվի օպտիմալացում և աճող շուկաներում կենտրոնացում։ Շվեյցարական մամուլը շեշտում է, որ Nestlé-ն կորցրել է իր «լեգենդար կայունությունը», իսկ ներդրողները սպասում են արմատական փոփոխությունների՝ ընկերության դանդաղած զարգացմանը նոր շունչ հաղորդելու համար։