Հնդկաստանը մեծացնում է դեղագործական արտադրանքի արտահանումը Ռուսաստան

Հնդկական դեղագործական ընկերությունները սկսել են ակտիվորեն փնտրել նոր շուկաներ՝ ԱՄՆ-ի կտրուկ մաքսատուրքերի բարձրացումից հետո։ Reuters-ի տեղեկություններով՝ ռուսական շուկան դիտարկվում է որպես հիմնական ուղղություն, իսկ Բրազիլիան ու Նիդեռլանդները՝ այլ հեռանկարային տարբերակներ։ Չնայած դեղագործական արտադրանքը ներկայումս ազատված է 50 տոկոսանոց մաքսատուրքերից, Հնդկաստանում մտավախություն ունեն, որ իրավիճակը կարող է փոխվել։

ԱՄՆ-ի մաքսատուրքերի բարձրացումը, որը կապված է Հնդկաստանի կողմից ռուսական նավթի շարունակվող գնումների հետ, սպառնում է նվազեցնել երկրի արտահանումը 10-15 տոկոսով և վտանգի տակ դնել միլիոնավոր աշխատատեղեր։ Հնդկաստանի առևտրային կազմակերպությունները կառավարությանը հորդորել են արագացնել այլ շուկաներ գտնելու գործընթացը՝ տնտեսության պաշտպանվածությունն ամրապնդելու համար։

Արդյունաբերության ներկայացուցիչները վստահ են, որ Հնդկաստանը կարող է 20 տոկոսով ավելացնել իր դեղագործական արտադրանքի արտահանումը նոր շուկաներ։ Ռուսաստանում, Բրազիլիայում և այլ երկրներում դիրքերի ամրապնդումը կօգնի նվազեցնել կախվածությունը ԱՄՆ շուկայից և մեղմել տնտեսական ճնշումները։