Չինաստանի ռազմական շքերթը ցույց տվեց Սիի նոր աշխարհակարգի ռազմական հիմքերը

Պեկինի կենտրոնով անցած հսկայական ռազմական շքերթը ցույց տվեց Չինաստանի աճող ռազմական հզորությունը՝ ընդգծելով Սի Ծինփինի տեսլականը նոր աշխարհակարգի մասին, որտեղ Չինաստանը հանդես է գալիս որպես գերիշխող ուժ։ Շքերթի գլխավոր նորույթներից էր DF-61 միջմայրցամաքային բալիստիկ հրթիռը և շարժական լազերային հակաօդային համակարգերը, որոնք կարող են փոխել ուժերի հավասարակշռությունը տարածաշրջանում։ Շքերթին ներկայացված էին նաև հիպերձայնային թևավոր բլոկներ և լայն տեսականիով դրոններ՝ ծովային, օդային և ցամաքային մարտական գործողությունների համար։

Հատուկ ուշադրություն էր դարձված Չինաստանի հսկայական արդյունաբերական ներուժին՝ զենքի արագ արտադրության և տեղակայման հնարավորություններին, որոնք համեմատվում են ԱՄՆ-ի՝ Երկրորդ համաշխարհային պատերազմի տարիների արդյունաբերական հզորության հետ։ Վերլուծաբանները նշում են, որ Չինաստանը տարածաշրջանում մի քանի անգամ գերազանցում է հարևանների՝ Ճապոնիայի և Հարավային Կորեայի ռազմական ծախսերը, և մինչև 2030 թվականը կունենա մոտ 48%-ով ավելի նավատորմ, քան ԱՄՆ-ը։

Այնուամենայնիվ, փորձագետները զգուշացնում են, որ Չինաստանի բանակը երկար տարիներ չի մասնակցել բարձր ինտենսիվության պատերազմների, իսկ ցուցադրված զինատեսակները դեռ չեն անցել մարտական փորձարկումներ։ Չնայած տպավորիչ տեխնոլոգիաներին և ինքնուրույն արտադրության կարողություններին, վերլուծաբանների կարծիքով՝ ԱՄՆ-ը շարունակում է մնալ աշխարհի ամենահզոր բանակը, սակայն Չինաստանի և ԱՄՆ-ի միջև տարբերությունը նվազում է աննախադեպ տեմպերով, փոխանցում է Reuters-ը։