Երևանի քաղաքապետարանն այս տարվա Գրքի միջազգային փառատոնին հատկացրել է 25 միլիոն դրամ

Հայաստանի ազգային պատկերասրահի Որմնանկարների սրահում տեղի ունեցավ մամուլի ասուլիս՝ նվիրված Գրքի երևանյան միջազգային 8-րդ փառատոնին։ 

«Արմենպրես»-ի հաղորդմամբ՝ փառատոնը կանցկացվի սեպտեմբերի 5-7-ը Հայաստանի ազգային պատկերասրահում, իսկ գրքի տոնավաճառը՝ Հայաստանի ազգային պատկերասրահի և Հայաստանի պատմության թանգարանի կամարաշարում:

Երևանի փոխքաղաքապետ  Լևոն Հովհաննիսյանն իր խոսքում նշեց, որ երրորդ տարին անընդմեջ Երևանի քաղաքապետարանը ստանձնում է տվյալ փառատոնի գլխավոր հովանավոր լինելու պատվաբեր գործը։ 

 «Այս տարվա միջոցառմանը Երևանի քաղաքապետարանը հատկացրել է 25 միլիոն դրամ։ Հաճելի է արձանագրել, որ փառատոնի աշխարհագրությունն ընդլայնվել է և արդեն ընդգրկում է ՀՀ մարզերը։ Մենք նաև բովանդակային մասով ունենք բավականին մեծ առաջընթաց։ Համանման փառատոնների հետ միջազգային համագործակցության և ներկայացուցչության մասով ևս ունենք առաջընթաց։ Ավանդույթի համաձայն՝ Երևանի քաղաքապետարանը նախորդ երեք տարիներին փառատոնի շրջանակում երկու անգամ կազմակերպել և հովանավորել է միջոցառումներ։ Օրինակ՝ Թումանյանի ծննդյան օրվա առթիվ փետրվարին Շառլ Ազնավուրի անվան հրապարակում կազմակերպված Գրքի և հրատարակիչների մեծ միջոցառման ընթացքում տարբեր հրատարակիչներ մինչև 30-40 տոկոս զեղչով ներկայացրել են հանրությանն իրենց վերջին նորությունները»,- ասաց Հովհաննիսյանը։

Բացի դրանից, նա հայտնեց, որ յուրաքանչյուր տարի Երևանի քաղաքապետարանը մինչև 40 միլիոն դրամ հատկացնում է գրադարանների գրքերի ֆոնդը թարմացնելուն, արդեն ձեռք է բերվել 30 հազար նոր գիրք։ Այդ գործընթացը շարունակական է։ Կա նաև գրադարանների դերը վերաիմաստավորելու և ավելի արդիական վայր դարձնելու ծրագիր։ 

«Փառատոնը շատ կարևոր իրադարձություն է, և, ինչպես նախորդ տարիներին, հույս ունենք, որ այս տարի նույնպես կլինի հանրության ուշադրության կենտրոնում։ Փառատոնի բացման արարողությանը ներկա կլինի նաև քաղաքապետ Տիգրան Ավինյանը»,- հավելեց Հովհաննիսյանը։

ՀՀ ԿԳՄՍ նախարարի տեղակալ Դանիել Դանիելյանը նույնպես ուրախությամբ նշեց, որ փառատոնի աշխարհագրությունը մեծանում է ինչպես միջազգային, այնպես էլ ներպետական առումով։ 

 «Այս տարի նախատեսել ենք, որպեսզի երևանյան փառատոնի երկու հատվածները նույն ձևաչափով ու տրամաբանությամբ անցկացնենք Շիրակի և Սյունքի մարզերում։ Սա միայն գրքի վաճառքի, հրատարակության կամ տպագրության փառատոն չէ, այն ավելին է, որովհետև եթե անդրադառնում ենք կրթությանը, գիտությանը, մշակույթին, սպորտին կամ այլ ոլորտներին, եթե ուզում ենք համաչափ զարգացնել մշակույթը կամ ոլորտային այլ ճյուղերը, ապա պետք է հիմնվենք գիտելիքի վրա, ինչը մեզ տալիս է գիրքը։ Անհրաժեշտ է մեզանում խթանել ընթերցանությունը։ Փառատոնը հրաշալի առիթ է, որպեսզի ցուցադրենք հանրությանն ու համայն աշխարհին, թե ինչպիսին է մեր ստեղծագործական ներուժը։ ԿԳՄՍ նախարարությունն իրականացնում է այնպիսի քաղաքականություն, որպեսզի նման միջոցառումները լինեն հնարավորինս շատ։ Փառատոնը կարևոր է նաև այն առումով, որ լինելու են հանդիպումներ, որոնց ընթացքում կքննարկվեն կարևոր հարցեր։ Սա նաև այն կարևոր հարթակն է, որն իր էությամբ ապաքաղաքական է։ Մշակույթն ու կրթությունը քաղաքականությունից դուրս են ու հավերժ»,- ասաց Դանիելյանը։  

 Եղիշե Չարենցի անվան գրականության և արվեստի թանգարանի տնօրեն և փառատոնի համակազմակերպիչ Սյուզաննա Խոջամիրյանն իր հերթին շեշտեց, որ փառատոնը չի դադարում կատարելագործվել և ընթացիկ տարվանն էլ բացառություն չէ, քանզի կան նորամուծություններ։

 «Վիլյամ Սարոյանի անվանակարգի հաղթողն այս տարի ստանալու է մեծահամբավ գրողի բնօրինակ գունանկարներից մեկը, որը երեք օր շարունակ հնարավոր կլինի տեսնել փառատոնի շրջանակում։ Սարոյանի 104 աշխատանքները, որոնք բերվել են ԱՄՆ-ից, կցուցադրվեն արվեստի և գրականության թանգարանում։ Այս տարի մեզ մոտ կրկին կհանդիպեն գրականությունն ու արվեստը՝ աշխարհասփյուռ հայ գրականության շուրջ։ Փառատոնը, գրքերն ու բառերն այս տարի գունավոր են, հետևաբար մնում է միասին նշենք բառերի ու գույների այս հրավառությունը»,- ասաց Խոջամիրյանը։ 

 Գրքի երևանյան միջազգային փառատոնի տնօրեն Անի Ղազարյանն էլ ամփոփիչ խոսքում անդրադարձավ փառատոնի շրջանակում նախանշված իրադարձություններին՝ նկատելով, որ երեք օր շարունակ Երևանի սիրտը կբաբախի գրքերի ռիթմով։ 

 «Այս տարվա գրքի տոնավաճառին կմասնակցեն 50-ից ավելի հրատարակչություններ, տպարաններ, գրախանութներ, թանգարաններ, գրադարաններ, կրթամշակութային հաստատություններ՝ առաջարկելով բացառիկ զեղչեր։ Երեք օր շարունակ Երևանը կդառնա գրքի մայրաքաղաք՝ հյուրընկալելով հայ և արտասահմանյան հրատարակչությունների, նշանավոր գրողների, գրականագետների, արվեստագետների և հազարավոր ընթերցողների։ Բաց և հասանելի միջավայրում գրահրատարակչական դաշտի ներկայացուցիչները կարող են ներկայացնել ու վաճառել իրենց գրքերը»,- տեղեկացրեց Ղազարյանը։

 Նա հավելեց, որ առաջին անգամ Գրքի երևանյան փառատոնի և Սարոյան հիմնադրամի բացառիկ համագործակցության շրջանակում կանցկացվի Վիլյամ Սարոյանի անվան կարճ պատմվածքի մրցանակաբաշխություն, որի նպատակն է անգլերեն գրված կամ անգլերեն թարգմանված կարճ պատմվածքների գնահատումը։ 

 «Այս մրցանակը ոգեշնչված է Սարոյանի ժառանգությամբ՝ խրախուսելով պատմվածքագրությունը և գրական վարպետությունը։ Փառատոնի բաղկացուցիչ մաս կազմող գրական մրցույթին այս տարի մասնակցության հայտ է ներկայացրել108 գրող 25 երկրից։ Փառատոնի փակման արարողության ժամանակ կհայտարարվեն Սարոյանի անվան կարճ արձակի և գրական մրցույթի հաղթողների անունները։ 

Մեկ այլ կարևոր նորամուծություն է Միջազգային հրատարակիչների ֆելոուշիփ ծրագիրը, որի նպատակն է խթանել հայ գրականության համաշխարհային ճանաչումը՝ ստեղծելով համագործակցության հարթակ հայ և արտասահմանյան հրատարակիչների ու գրական գործակալությունների միջև։ Հայաստան են ժամանելու հյուրեր Միջազգային հրատարակիչների ասոցիացիայից, Հունաստանից, Վրաստանից, Իտալիայից, Լատվիայից։ Այցի շրջանակում նրանք պարտավորվում են իրենց երկրի լեզվով թարգմանել հայ հեղինակի գործ, ինչը մշակութային նոր կապեր ստեղծելու հիանալի հիմք է»,-եզրափակեց Ղազարյանը։

Գրքի երևանյան միջազգային փառատոնը Հայաստանում գրահրատարակչական ոլորտի ամենամեծ գրական իրադարձությունն է։ Փառատոնը մեկնարկել է 2017 թվականին՝ ՀՀ ԿԳՄՍ նախարարության նախաձեռնությամբ, իսկ 2023 թվականից Երևանի քաղաքապետարանը հանդիսանում է փառատոնի գլխավոր հովանավորը։ Փառատոնի ընթացքում վաճառվում է ավելի քան 12 000 գիրք, տեղի է ունենում 40-ից ավելի միջոցառում։ Նախորդ տարվա փառատոնն ունեցել է 30 000-ից ավելի այցելու, այդ թվում՝ արտասահմանյան երկրներից։