Հայաստանի և Ադրբեջանի միջև ստորագրված փաստաթղթերում «միջանցքի» մասին որևէ հիշատակում չկա․ Իրանի դեսպան

Ոչ խաղաղության համաձայնագրի փաստաթղթում, ոչ էլ Վաշինգտոնում երկու երկրների կողմից ստորագրված հայտարարության մեջ չեն հիշատակվում տրանսպորտային երթուղիները կամ «միջանցք» կոչվող որևէ բան, այլ քննարկվում է միայն տրանսպորտային ուղիների բացումը, որոնք կապահովեն Ադրբեջանի մուտքը Նախիջևան, իսկ Հայաստանն իր հերթին երկաթուղով կկապվի Իրանի Ջուլֆայի հետ։ Հայտարարել է Հայաստանում Իրանի դեսպան Մեհդի Սոբհանին, գրում է Isca News-ը:

«Հայաստանն ու ԱՄՆ-ն բանավոր, այլ ոչ թե գրավոր համաձայնության են եկել Հայաստանում հայ-ամերիկյան համատեղ ձեռնարկություն գրանցելու և օպերատոր ու ներդրող սահմանելու մասին, որն ամբողջությամբ կսահմանվի Հայաստանի ազգային ինքնիշխանության և իրավասության շրջանակներում ու կկարգավորվի Հայաստանի անվտանգության մարմինների, անձնագրային հսկողության և մաքսային ընթացակարգերի շրջանակներում: Ըստ համաձայնագրի՝ դա կլինի մի տեսակ օպերատորություն, այլ ոչ թե երթուղու տնօրինում», - ասել Է Իրանի դեսպանը։

Նրա խոսքով՝ Ադրբեջանի և Հայաստանի միջև հայտարարության տեքստում, որի մանրամասները պետք է քննարկվեն երկու երկրների կողմից ապագայում, ամբողջությամբ հաշվի են առնվել հինգ սկզբունքները, որոնք ցանկանում է Իրանը, «ներառյալ ազգային ինքնիշխանության հարգումը, սահմանների ամբողջականության հարգումը, իրավազորությունը, փոխադարձությունն ու սահմանների անխախտելիությունը, ուստի անհանգստանալու ոչ մի հիմք չկա»: