Դոլարը սեպտեմբերին կարող է հասնել 86 ռուբլու

Սեպտեմբերին դոլարի փոխարժեքը Ռուսաստանում կարող է բարձրանալ մինչև 85-86 ռուբլու, կանխատեսում է տնտեսագետ և ֆինանսական հաղորդակցությունների մասնագետ Անդրեյ Լոբոդան, գրում է Bankiros-ը։ Չնայած ֆինանսների նախարարության կողմից արտարժույթի վաճառքի ծավալների ավելացմանը՝ որը պետք է կայունացնի շուկան, իրավիճակը շարունակում է կախված մնալ աշխարհաքաղաքական զարգացումներից, պատժամիջոցներից և Կենտրոնական բանկի քաղաքականությունից։

Լոբոդան նշել է, որ ռուբլու արժեվորման դինամիկան առաջիկա ամիսներին կախված կլինի ներդրողների սպասումներից, ինչպես նաև բանկային սեկտորի քաղաքականությունից։ Սեպտեմբերին շուկայի վրա ազդելու են նաև Կենտրոնական բանկի՝ տոկոսադրույքի հնարավոր նվազման որոշումը, Ուկրաինայի շուրջ բանակցությունները և ԱՄՆ Դաշնային պահուստային համակարգի նիստի արդյունքները։

Մասնագետները կանխատեսում են, որ այս սցենարների ազդեցությամբ դոլարի փոխարժեքը կարող է տատանվել 78-79-ից մինչև 85-86 ռուբլու սահմաններում։ Ենթադրվում է, որ եվրոն կարող է արժենալ 93-96 ռուբլի, իսկ յուանը՝ 11,15-11,3 ռուբլի։ Տնտեսագետները զգուշացնում են՝ ռուբլու ամրապնդման գործոնները սպառվում են, իսկ բյուջետային ծախսերը շարունակում են մնալ բարձր մակարդակի վրա։