Իրանի դիրքորոշումը տատանվում է ծայրահեղությունների մեջ

Հունվարի 21-ին Իսլամական հեղափոխության պահապանների կորպուսի ներկայացուցիչը հայտարարել է, որ արտառոց ոչինչ չկա Պարսից ծոցում ԱՄՆ ռազմական նավերի ներկայության մեջ։ Կորպուսի հրամանատարի տեղակալ Հոսեյին Սալամիի խոսքերը փոխանցում է «Reuters»-ը։

«Ամերիկյան նավերն ու ռազմական ուժերը Պարսից ծոցում և Մերձավոր Արևելքում են երկար տարիներ շարունակ։ Պենտագոնի՝ նոր ռազմանավ ուղարկելու որոշման մեջ արտառոց ոչինչ չկա, քանի որ դա պետք է գնահատել տարածաշրջանում ԱՄՆ մշտական ներկայության համատեքստում»,– հայտարարել է Սալամին։

Այս բառերն, իհարկե, ծայրահեղորեն տարբերվում են Իրանի նախկին արձագանքից՝ ամերիկյան ռազմածովային նավերի տեղաշարժերի հետ կապված։ Հիշեցնենք, որ 2011 դեկտեմբերին, երբ ամերիկյան ատոմային ավիակիր «Ջոն Ստեննիսը» հեռացավ Արաբական ծովի ջրերից, Թեհրանը Վաշինգտոնին սպառնացել էր «պատասխան քայլերով»՝ Պարսից ծոց մեկ այլ ռազմանավի վերադառնալու դեպքում։ Սակայն դրանից հետո Արաբական ծովի ավազանում հայտնվեց ամերիկյան մեկ այլ ավիակիր՝ «Աբրահամ Լինքոլնը»։