Ռուսաստանը ձվեր է ուղարկում ԱՄՆ․ արտահանումը կփրկի տեղական շուկան

ՌԴ-ում արձանագրված ձվերի ավելցուկային արտադրությունը բերեց գնային ճնշման՝ վնասելով հատկապես փոքր և միջին ֆերմերներին։ Պետդումայի գյուղատնտեսական հարցերի կոմիտեի փոխնախագահ Յուլիա Օգլոբլինան նշել է, որ այս պայմաններում արտահանումը դարձել է ոչ թե հնարավորություն, այլ անհրաժեշտություն։ Նրա խոսքով՝ միջազգային պահանջարկը ապացուցում է ռուսական արտադրանքի որակը։

Ամերիկայի Միացյալ Նահանգները հուլիսին առաջին անգամ 1992-ից ձեռք բերեց ռուսական ձու։ Չնայած վերջին ամիսներին ԱՄՆ-ում գներն իջել են՝ թռչնագրիպի հետևանքով բարձրացմանից հետո, դրանք դեռևս մնում են ավելի քան 16 տոկոսով բարձր անցյալ տարվա համեմատ։

Ռուսաստանում հակառակ պատկերն է․ 2023-ի վերջի կտրուկ թանկացումից հետո իշխանությունները մեծացրին ներմուծումները, ինչի հետևանքով գները գարնանը նվազեցին մինչև 100 ռուբլուց պակաս՝ առաջացնելով ճգնաժամ ոլորտում։ Արտահանումը դիտվում է որպես շուկայի հավասարակշռման և արտադրողների եկամուտների կայունացման ուղի։