Շրի Լանկայում ավտոբուսի վթարի զոհերի թիվը հասել է 15-ի

The Sun-ի տվյալներով՝ Շրի Լանկայում զբոսաշրջիկներով ավտոբուսի վթարի հետևանքով զոհվել է առնվազն 15 մարդ, ևս 16-ը, այդ թվում՝ երեխաներ, ստացել են տարբեր աստիճանի վնասվածքներ։ Միջադեպը տեղի է ունեցել սեպտեմբերի 4-ի երեկոյան՝ Վելավայա քաղաքի մոտակայքում՝ լեռնային ճանապարհին։

Տուժածների խոսքով՝ ավտոբուսը բախվել է այլ մեքենայի, ինչից հետո ձախողվել է արգելակային համակարգը։ Վարորդը հասցրել է նախազգուշացնել ուղևորներին՝ ավտոբուսի գահավիժումից մի քանի րոպե առաջ։ Ավտոբուսը բախվել է ճաղապատնեշին, պայթել և գլորվել ձոր։

Սա վերջին ամիսների երկրորդ խոշոր ողբերգական վթարն է Շրի Լանկայում․ մայիսին ևս մեկ ավտոբուս էր ընկել լեռնային ճանապարհից՝ խլելով 16 մարդու կյանքը և վիրավորելով շուրջ 20 ուղևորի։