Իսրայելի բանակը կոչ է անում Գազայի բնակիչներին լքել քաղաքը՝ հարձակման նախաշեմին

Իսրայելի բանակը հայտարարել է, որ Գազայի քաղաքի բնակիչները պետք է տեղափոխվեն հարավ՝ դեպի Խան Յունիսի առափնյա «հումանիտար գոտի», քանի որ իսրայելական ուժերը խորանում են ռազմական գործողությունների մեջ՝ քաղաքը լիովին գրավելու նպատակով։ Վարչապետ Բենյամին Նեթանյահուի հրամանով իրականացվող այս հարձակումը սպառնում է տեղահանել հարյուր հազարավոր մարդկանց, որոնք երկու տարվա պատերազմից հետո ապաստան են գտել Գազայի ամենամեծ քաղաքում, հայտնում է Reuters-ը։

Իսրայելի բանակի տվյալներով՝ ներկայում վերահսկվում է Գազայի քաղաքի մոտ կեսը և ամբողջ գոտու շուրջ 75%-ը։ Գազայի վրա հարվածները շարունակվում են շաբաթներ շարունակ՝ առաջ շարժվելով քաղաքի ծայրամասերից դեպի կենտրոն։ Պաշտոնյաները նշում են, որ Նեթանյահուն հրամանը տվել է՝ չնայած զինվորական ղեկավարության նախազգուշացումներին։ Գործողությունները, սակայն, ուժեղացնում են Իսրայելի դիվանագիտական մեկուսացումը՝ միջազգային հանրության քննադատության ֆոնին։

Համաձայն պաղեստինյան աղբյուրների՝ պատերազմի ընթացքում սպանվել է ավելի քան 64 հազար մարդ, իսկ գոտու մեծ մասը վերածվել է ավերակների։ Մինչդեռ տասնյակ պատանդներ դեռ պահվում են ՀԱՄԱՍ-ի վերահսկողության տակ, և պահանջներ են հնչում պատերազմը դադարեցնելու և պատանդների ազատման շուրջ նոր բանակցություններ սկսելու համար։ Իսրայելը շարունակում է պնդել, որ կշարունակի հարձակումները մինչև ՀԱՄԱՍ-ը զինաթափվի կամ լիովին ոչնչացվի։