BMW-ն վստահ է՝ Չինաստանում վաճառքները կաճեն նոր էլեկտրական շարքի շնորհիվ

BMW-ն վստահ է, որ կկարողանա վերականգնել վաճառքների աճը իր ամենամեծ շուկայում՝ Չինաստանում, նոր ամբողջությամբ էլեկտրական Neue Klasse շարքի միջոցով։ Ընկերության ֆինանսական տնօրեն Վալտեր Մերտլը Reuters-ին հայտնել է, որ նոր մոդելների զանգվածային հասանելիությունը կօգնի հետ բերել շուկայի բաժինը, որը 2025-ի առաջին կեսին նվազել էր 15,5%-ով՝ տեղական մրցակցության և անշարժ գույքի ճգնաժամի ֆոնին։

Neue Klasse-ի առաջին մոդելը՝ iX3 էլեկտրական քրոսովերը, BMW-ն ներկայացրել է Մյունխենում կայանալիք IAA ավտոսալոնի նախօրեին, իսկ Չինաստանի շուկա այն կհայտնվի 2026-ի ամռանը։ Մերտլի խոսքով՝ նոր մեքենաների մարտկոցները 40-50%-ով ավելի էժան կլինեն, ինչը թույլ կտա հասնել շահութաբերության նույն մակարդակին, ինչի վրա են ներկա պահին ներքին այրման շարժիչով մեքենաները։

BMW-ն նախատեսում է մինչև տասնամյակի ավարտը աստիճանաբար փոխարինել հին մոդելները Neue Klasse շարքով։ Ընկերությունը սպասում է 2025-ին 5-7% շահութաբերության, իսկ ապագայում նպատակ ունի բարձրացնել այն մինչև 8-10%։ Մերտլը նաև զգուշացրել է, որ ԱՄՆ ներմուծման մաքսատուրքերը 2025-ին կիջեցնեն շահույթի մարժան 1,25 տոկոսային կետով, սակայն ԵՄ-ի և ԱՄՆ-ի մաքսային նոր պայմանավորվածությունները կարող են մեղմել ճնշումը ավտոարտադրողների վրա։