Տիգրան Մկրտչյանը Կրետեի համալսարանի պրոռեկտորին է ներկայացրել «Ակադեմիական քաղաք» նախագիծը

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Կրետեի համալսարանի պրոռեկտոր, պրոֆ. Մարիա Վամվակակիին։ Այդ մասին հայտնում է Հունաստանում ՀՀ դեսպանությունը։  

Հանդիպմանը քննարկվել են համալսարանական ոլորտում համագործակցության հեռանկարները։

Պրոռեկտոր Վամվակակին ներկայացրել է համալսարանի հիմնակսն ուղղություններն ու առավելությունները։ Առանձնապես կարևորվել է համալսարանի բժշկական դպրոցը, որն ունի նաև Հունաստանի լավագույն հիվանդանոցներից մեկը։

Կրետեի համալսարանի պրոռեկտորը նշել է, որ համալսարանն ունի բակալավրական մեկ ծրագիր` բժշկական ուղղությամբ, որն ամբողջությամբ անգլերեն է, իսկ մագիստրատուրայում կա այդպիսի 18 ուղղություն։

Դոկտորանտուրայում բոլոր ուղղություններ հունարեն չտիրապետողների համար ամբողջապես կարող են իրականացվել նաև անգլերեն։ Դեսպան Մկրտչյանն անդրադարձել է հուլիսին ՀՀ ԿԳՄՍ նախարարի և Հունաստանի կրթության և կրոնական հարցերի նախարարի միջև կայացած հանդիպմանը, դրա ընթացքում ձեռք բերված պայմանավորվածություններին։

Դեսպանն ընդգծել է, որ երկու նախարարների միջև ստորագրված կրթության և գիտության բնագավառներում 2025-2029 թթ ծրագիրը համագործակցության լայն դաշտ է բացում Հայաստանի և Հունաստանի միջև։

Այդ շրջանակներում Կրետեի համալսարանի հետ հայկական ԲՈՒՀ-երը բազմաթիվ ուղղություններով կարող են զարգացնել հարաբերությունները։

Դեսպանը նաև ներկայացրել է ՀՀ կառավարության «Ակադեմիական քաղաք» նախագիծը և ծանոթացել Կրետեի համալսարանի՝ Հերակլիոնում և Ռեթիմնոյում գործող կամպուսների կազմակերպման առանձնահատկություններին։