«Հինգ աչք» դաշինքի երկրները կքննարկեն մարդկանց թրաֆիքինգով զբաղվող խմբերի ջախջախման հարցը

Մեծ Բրիտանիայի, Միացյալ Նահանգների և «Հինգ աչք» (Five Eyes) դաշինքի այլ երկրների ներքին գործերի նախարարներն այս շաբաթ կհայտարարեն սահմանների անվտանգությունն ամրապնդելու և  մաքսանենգների դեմ պայքարի նոր միջոցառումների մասին, կիրակի օրը հայտարարել է Մեծ Բրիտանիայի ներքին գործերի նախարար Շաբանա Մահմուդը, հաղորդում է Reuters-ը։

«Հինգ աչք» հետախուզական տվյալների փոխանակման ցանցի երկրների՝ ԱՄՆ-ի, Մեծ Բրիտանիայի, Կանադայի, Ավստրալիայի և Նոր Զելանդիայի նախարարները կհանդիպեն Լոնդոնում երկուշաբթի և երեքշաբթի օրերին, հայտնել է Մեծ Բրիտանիայի ներքին գործերի նախարարությունը։

Բանակցությունների կենտրոնում կլինեն «մաքսանենգությամբ զբաղվող հանցավոր խմբավորումներին ջախջախելու» միջոցառումները։

«Մենք կհամաձայնեցնենք մեր սահմանները պաշտպանելու նոր միջոցառումներ մեր Five Eyes գործընկերների հետ՝ լուրջ հարված հասցնելու մաքսանենգներին», - ասել է Մահմուդը, որը նշանակվել է իր պաշտոնում ընդամենը ուրբաթ օրը այն բանից հետո, երբ Բրիտանիայի վարչապետ Քիր Սթարմերը կառավարական վերադասավորումներ է կատարել։

Բացի մարդկանց մաքսանենգությունից, խումբը կքննարկի նոր միջոցառումներ՝ պայքարելու նրանց դեմ, ովքեր կանգնած են համացանցում երեխաների նկատմամբ սեռական բռնության հետևում, և ինչպես դադարեցնել մահացու սինթետիկ օփիոիդների տարածումը, հայտնել են ներքին գործերի նախարարությունից։

Մահմուդին բանակցություններում կմիանան ԱՄՆ ներքին անվտանգության նախարար Քրիստի Նոեմը, Կանադայի նախարար Գարի Անանդա Սանգարին, Ավստրալիայի ներքին գործերի նախարար Թոնի Բերքը և Նոր Զելանդիայից Ջուդիթ Քոլինզը։

Աշխարհի երկրները ջանում են լուծել միգրացիայի խնդիրը, իսկ ԱՄՆ նախագահ Դոնալդ Թրամփը օրինական և անօրինական ներգաղթի դեմ պայքարը դարձրել է Սպիտակ տանը իր երկրորդ նախագահական ժամկետի կենտրոնական խնդիրը։

Մեծ Բրիտանիայում, մինչդեռ, սա դարձել է գերիշխող քաղաքական թեմա, քանի որ կառավարությունը ուժեղ ճնշման տակ է մրցակիցների կողմից՝ կապված ապաստանի դիմումների ռեկորդային թվի և Լա Մանշով փոքր նավակներով միգրանտների ժամանման հետ։

news.am