Իսրայելն ավիահարվածներ Է հասցրել Սիրիային

Իսրայելը մի շարք ավիահարվածներ է հասցրել Սիրիայի Հոմսի, Լաթաքիայի և Պալմիրայի մերձակա տարածքներին, ինչն առաջացրել է Դամասկոսի կտրուկ արձագանքը և տարածաշրջանում իրավիճակի նոր սրումը: Այս մասին հայտնում է Reuters  գործակալությունը։

Ըստ տեղական ԶԼՄ-ների՝ իսրայելական ավիացիան հարվածներ է հասցրել Հոմսի, Լաթաքիայի և Պալմիրայի մերձակա տարածքներին: Սիրիայի ԱԳՆ-ն խստորեն դատապարտել է հարձակումները՝ դրանք անվանելով «ինքնիշխանության կոպիտ խախտում» և սպառնալիք ողջ տարածաշրջանի անվտանգության համար:

Պաշտոնական հայտարարության մեջ նշվում է՝ այդ հարվածները դիտարկվում են որպես էսկալացիաների շարքի շարունակություն, որոնք Իսրայելն իրականացնում է վերջին ամիսներին: Հաղորդվում է՝ սիրիական լրատվամիջոցները մանրամասներ չեն հայտնել ավիահարվածների հետևանքով ավերածությունների ծավալների կամ զոհերի թվի մասին: Իսրայելի կողմից ևս պաշտոնական մեկնաբանություններ դեռևս չեն ստացվել: